Коронавирусот во моментов има заразено речиси 250 илјади лица во светот и е причина за смртен исход кај над 10 илјади пациенти. Иако до скоро се располагаше со податокот дека од коронавирус не е починато ниту едно дете помладо од 10 години, најновите извештаи објавени во списанието New England Journal of Medicine, потврдија два смртни случаи на деца во Кина. Станува збор за десетмесечно машко бебе, кое и пред заразата со коронавирус било болно, како и за дете на 14 години, за кое не се наведуваат никакви податоци. Во извешатјот е наваедено и тоа како децата се преносители на вирусот, иако ретко заболуваат.
Во група од 171 заразено дете, која била набљудувана, десетмесечното бебе било едно од трите пациенти на кое му било потребно лекување во единица на Интензивна нега и помош од респиратор за дишење. Тројцата пациенти биле лекувани во детска болница во Вухан и сите имале некои други здравствени проблеми пред да се заразат со коронавирусот. Што се однесува до 14 годишното дете, не е објавено дало страдало од некој друг здравствен проблем.
Во споменатата студија, научниците се занимавале и со проучување на статистиката на заболувањето на момчињата и девојчињата, како и фактот дали во одредена возраст децата се сепак изложени на поголем ризик од вирусот. Студијата открила мала разлика помеѓу веројатноста да се инфицираат или да заболат момчиња или девојчиња.
Повеќе од 4,4% од децата во извештајот биле без видливи симптоми. Дополнителни 51% имале благи симптоми, како кашлица, воспаление на грлото, течење на нос и кивање, а понекогаш и треска, замор и болка во телото. Во некои случаи, децата имале симптоми како мачнина, повраќање, болки во желудникот и дијареа.
Преостанатите 39% од децата биле умерено болни. Имале симптоми како воспаление на белите дробови со кашлица, која напредувала од сува до продуктивна. Прегледот покажал мали лузни и оштетувања на белите дробови кај заболените деца, а лекарите слушнале и свирење во градите.
Во тешките случаеви, треската, кашлицата и понекогаш гастроинтестиналните симптоми напредувале во период од околу една недела, се до потешкотии со дишењето. Најтешки симптоми имале бебињата помлади од една година, додека најблаги симптоми покажувале тинејџерите.
“За разлика од заразените возрасни лица, повеќето заразени деца имаат поблага клиничка слика“, напишале авторите на студијата во New England Journal of Medicine, но истакнале и дека останува да се реши уште една непознаница – дали 55% од заразените деца чии симптоми се неоткриени или се тешко воочливи, се способни да ја шират инфекцијата.
