Иако коронавирусот е респираторно заболување, заразените пациенти доживуваат голем број ефекти врз мозокот, што доведува до симптоми како што се мозочна магла, конфузија, губење на мирис и вкус со ризик од мозочен удар.
Понатаму, неколку студии покажаа дека вирусот САРС-КоВ-2 може да предизвика забрзано стареење. Истражувачите сугерираат дека мозокот на некои пациенти може да остари 10 години, а неодамнешната студија објавена во журналот за клиничка медицина покажа дека трајните ментални ефекти од тешкиот Ковид-19 би можеле да бидат еквивалентни на 20 години стареење.
„Когнитивното оштетување е вообичаено за широк спектар на невролошки нарушувања, вклучувајќи деменција, па дури и рутинско стареење. Но, шемите што ги видовме кај Ковид се разликуваат“,
професор Дејвид Менон
Големо влијание врз когнитивните способности
Студијата била спроведена од истражувачи од Универзитетот Кембриџ и Империјал колеџ во Лондон, и опфатила 46 испитаници кои биле лекувани од Ковид-19.
Истражувачите откриле дека пациентите страдале од когнитивни оштетувања и загуби слични на оние кои вообичаено се забележуваат кај луѓето на возраст од 50 до 70 години, односно ефектот бил како да изгубиле 10 IQ поени, пишува „Тајмс оф Индија“.
Исто така, истражувачкиот тим открил дека овие ефекти постоеле повеќе од шест месеци по тешката болест Ковид, а закрепнувањето одело многу постепено.
„Десетици илјади луѓе во Англија поминаа низ единиците за интензивна нега поради Ковид, а многумина исто така се разболеа без да бидат примени во болница. Ова значи дека голем број луѓе се соочуваат со когнитивни проблеми неколку месеци по прележување на болеста“, рече авторот на студијата, професорот Адам Хемпшир, додавајќи дека треба итно да се најдат начини да им се помогне на овие луѓе.
Низа симптоми се јавуваат неколку месеци по прележувањето
Има се повеќе докази дека Ковид-19 има силно влијание врз мозокот, предизвикувајќи долгорочни когнитивни и ментални проблеми.
Симптомите како што се мозочна магла, замор, нарушувања на спиењето, анксиозност, пациентите ги пријавуваат со месеци по закрепнувањето.
Податоците покажаа дека луѓето кои прележале Ковид биле помалку прецизни и имале побавно време на одговор од луѓето кои биле здрави и не се разболеле од вирусот. Ефектот бил уште поизразен кај пациенти кои биле на респиратор
Според неодамнешната студија, пациентите кои закрепнале од тешка форма на Ковид страдале од когнитивна загуба.
„Когнитивното оштетување е вообичаено за широк спектар на невролошки нарушувања, вклучувајќи деменција, па дури и рутинско стареење. Но, шемите што ги видовме кај Ковид се разликуваат“, додаде авторот на друга студија, професорот Дејвид Менон.
Тестовите на мозокот биле направени кај пациенти вклучени во студијата во просек шест месеци по закрепнувањето. Биле мерени нивните ментални способности, вклучувајќи меморија, внимание и расудување. Резултатите потоа биле споредени со здрави индивидуи.
Некои луѓе можеби никогаш нема да се опорават целосно
Податоците покажаа дека луѓето кои прележале Ковид биле помалку прецизни и имале побавно време на одговор од луѓето кои биле здрави и не се разболеле од вирусот. Ефектот бил уште поизразен кај пациенти кои биле на респиратор.
Професорот Менон изјави дека некои пациенти биле следени 10 месеци по закрепнувањето и дека било забележано мало подобрување.
„Иако ова не е статистички значајно, барем е чекор во вистинската насока. Но, постои можност некои од нив никогаш целосно да не закрепнат“, додаде тој.
Истражувачите, исто така, истакнаа дека благо оштетување е забележано и кај пациенти со поблага форма на Ковид.
