Ново истражување покажало дека детскиот имун систем е подобро подготвен за напади на коронавирусот од имуниот систем на возрасните, благодарение на клетките во нивниот горен респираторен тракт, кои се постојано во состојба на висока подготвеност.
Токму поради тоа, детскиот организам во случај на инфекција, успева брзо да го “одбие“ вирусот, односно пред тој масовно да се мултиплицира.
Тоа веројатно објаснува и зошто е многу помалку веројатно дека децата потешко ќе заболат од КОВИД-19 во споредба со возрасните, напишале научниците од Универзитетот во Берлин во списанието Nature Biotechnology.
“Сакавме да дознаеме зошто одбраната од вирусот очигледно многу подобро функционира кај децата“, вели Ирина Лехман, раководител на Одделот за молекуларна биологија при Берлинскиот здравствен институт.
Во потрага во одговор, научниците земале клетки од носната слузница на 42 здрави и 44 болни возрасни лица и деца. Потоа, меѓу другото, ја анализирале активноста на одредени гени во одредени клетки.
За брза борба со вирусот мора да бидат активни т.н. рецептори за препознавање, кои иницираат одбрана на организмот, појаснуваат експертите. И токму тој систем во клетките на горниот респираторен тракт и во некои клетки на имуниот систем бил целосно “поразбуден“ кај децата, покажала анализата.
Кај возрасните е спротивно, “Ситемот за рано предупредување“ е фатен неподготвен, а во тој случај вирусот се шири побрзо и поефикасно.
“Од оваа студија дознавме дека не постојат само ризик фактори за ковид, туку и фактори на заштита“, појаснува д-р Лехман.
Авторите тврдат дека нивните заклучоци би можеле да отворат пат за нови истражувања за тоа дали научниците можат превентивно да стимулираат заштитен одговор на коронавирусот кај пациенти со висок ризик како би го довеле на ниво какво што имаат децата изложени на вирусот.
