Ниту една земја нема да биде безбедна се додека сите земји поединечно не воспостават контрола врз растот на новозаразени
Научниците предупредуваат дека неконтролираниот раст на новоинфицирани со коронавирус во Бразил може да ја загрози борбата против пандемијата на глобално ниво.
Позаразниот сој P1, кој е поотпорен на вакцината против Ковид-19, стана доминантен во таа јужноамериканска држава и нема индикации дека ширењето на инфекцијата би можело да се забави.
„Таа информација е атомска бомба. Изненаден сум од количината на откриени варијанти на вирусот. Јавноста не разбира што значи тоа. Сите овие соеви се позаразни и ја забрзуваат епидемијата. Тоа е катастрофа“, рече д-р Роберто Кранкел, биолошки математичар од Ковид-19 центарот во Бразил, за „Вашингтон пост“.
Во Бразил, болничкиот систем е пред колапс, а земјата е далеку од вакцинирана.
„Ниту една земја нема да биде безбедна се додека сите земји поединечно не воспостават контрола врз растот на новозаразени“, рече д-р Дениз Гарет од Институтот за вакцини Сабин во Вашингтон.
Земји како Бразил, каде што нема ограничувања и каде што вирусот е на слобода, се вистинско легло за ширење на нови соеви, велат научниците
„Можеме да вакцинираме колку што сакаме и да постигнеме колективен имунитет, но се додека избивањето на епидемијата е неконтролирано во некои земји, границите за вирусот и понатаму ќе бидат отворени. Земји како Бразил, каде што нема ограничувања и каде што вирусот е на слобода, се вистинско легло за ширење на нови соеви“, рече Гарет, посочувајќи дека природниот имунитет на луѓето кои веќе прележале Ковид-19 е помалку отпорен на новите варијанти и дека се подложни на реинфекција.
„Прашање на време е. Овде, во Америка, добрата вест е дека вакцинирањето оди брзо, мора да се обидеме да го контролираме ова, бидејќи се чини дека вакцината делува на новите соеви, барем кога станува збор за спречување на тешки случаи и хоспитализации. Но, нема гаранции, вирусот се развива премногу брзо и ако другите држави не сторат нешто, ќе биде тука брзо. Сега е многу важно што прават другите земји кога станува збор за мерките и вакцинацијата“.
„Разбирам дека некои земји сакаат прво да ги вакцинираат своите граѓани, но ако нема подеднаква распределба на вакцините, заканата за светот ќе постои сè додека вирусот дивее во некои земји“, заклучува таа.
