Додека вакцините се сметаат за безбедни за употреба, сепак, постојат неколку несакани ефекти пријавени по вакцинирањето против Ковид-19. Еден од нив е т.н. „Ковид рака“ која се чини дека привлекува големо внимание, веројатно заради драматичното име. За што станува збор и дали треба да бидете загрижени?
50 проценти од пациентите кои имале ваква реакција по првата доза имале иста реакција и по втората, но вториот пат реакцијата се јавува многу побрзо и трае пократко
Професорката од универзитетот Јеил, д-р Алиша Литл, објаснува што треба да знаете. Според неа, „Ковид рака“ би требало да се нарече „Ковид рака по вакцинирање“, а се работи за реакција на компонентите на вакцината. „Во прашање е црвена, понекогаш се јавува со чешање, локална реакција на вакцината, која најчесто се појавува околу 7 дена по примање на вакцината, иако може да се јави и две недели подоцна“. Обично трае до 5 дена, понекогаш пократко, некогаш подолго, а повеќето пријави се стигнати по вакцинирањето со „Модерна“.
ЗОШТО ДОАЃА ДО РЕАКЦИЈА
Д-р Литл појаснува дека се работи за имунолошка реакција на раката на компонента на вакцината. Сепак, експертите не се целосно сигурни за која компонента станува збор. „Веројатно реакцијата е предизвикана од Т-клетки во имунолошкиот систем, за кои понекогаш се потребни и неколку дена да се активираат, а на истата компонента може да се активираат и порано при втората вакцинација“, додава таа.
Оваа реакција не е симптом на алергија и не е причина да се прескокне втората доза
Бидејќи вакцината треба да го активира имунолошкиот систем, можно е оваа реакција да е поврзана со имунолошкиот одговор кога во организмот се генерира протеин, или може да биде одговор кој не е директно поврзан со развој на имунитет на болеста, објаснува лекарката.
ШТО ДА ПРАВИТЕ АКО ВИ СЕ СЛУЧИ?
Според лекарката, не се работи за нешто што мора да ве загрижува. „Луѓето кои ќе го доживеат ова треба или поточно кажано, мора да добијат и втора доза од вакцината“, истакнува таа. Сепак, би можело да помогне ако втората доза ја примите во другата рака, а ако местото зафатено со осип е чувствително, одредени креми исто така би можеле да помогнат, но секако, во консултација со лекар.
КОГА ДОАЃА ДО ОВАА РЕАКЦИЈА?
Д-р Литл наведува дека 50 проценти од нејзините пациенти кои имале ваква реакција по првата доза имале иста реакција и по втората, но вториот пат реакцијата се јавува многу побрзо и трае пократко. Таа нагласува дека оваа реакција не е симптом на алергија и не е причина да се прескокне втората доза.
Обично трае до 5 дена, понекогаш пократко, понекогаш подолго, а повеќето пријави се по вакцинирањето со „Модерна“
Американскиот центар за превенција и контрола на болести предупредува на овие несакани ефекти на вакцината против Ковид-19:
- Болка
- Црвенило
- Појава на оток
- Замор
- Главоболка
- Мускулна болка
- Температура
- Гадење
Ако не се чувствувате добро, контактирајте лекар. Вакцинирајте се кога вакцината ќе ви биде достапна за да се заштитите себеси, но и сите околу вас.
