Истражувачите сугерираат дека скоро две третини (63,5%) од хоспитализациите се должеле токму на овие состојби и дека хоспитализацијата можеби и не би била неопходна ако пациентите немале една од овие состојби
Ново истражување сугерира дека повеќето случаи на Ковид-19 во САД се поврзани со четири постоечки здравствени состојби.
Авторите на студијата проценуваат дека меѓу 906.849 хоспитализирани лица во САД поради коронавирус, 30% од нив биле поврзани со дебелина, 26% со висок крвен притисок, 21% со дијабетес и 12% со срцева слабост.
Истражувачите сугерираат дека скоро две третини (63,5%) од хоспитализациите се должеле токму на овие состојби и дека хоспитализацијата можеби и не би била неопходна ако пациентите немале една од овие состојби.
Студијата е објавена онлајн на 25 февруари во „Journal of the American Heart Association“. Авторите сметаат дека треба да се стори повеќе за да се промовира здрав начин на живот за да се подобри квалитетот на животот и да се минимизира ризикот од тежок облик на Ковид-19.
Моделот по кој истражувачите стигнале до овие резултати, исто така, покажа и дека возраста и расата/етничката припадност се поврзани со хоспитализацијата поради Ковид-19. Имено, 29% од хоспитализираните лица биле постари од 65 години, а 8% од нив биле помлади од 50 години и биле хоспитализирани поради дијабетес. Покрај тоа, хоспитализациите биле поголеми кај припадниците на црната раса отколку кај белците.
„Ова не е само респираторен вирус. Тој предизвикува раширено васкуларно воспаление, што е во согласност со овие кардиометаболички состојби. Да ги нема нив, Ковидот би бил помалку опасен“, рече авторот на студијата и кардиолог Дариуш Мозафаријан.
Мозафаријан ја истакна потребата јавноста да ја разбере важноста на добрата исхрана.
„Тоа е основата за оздравување. Лошата исхрана најмногу придонесува за болестите. Ковид-19 е брза пандемија која тече придружена со бавна пандемија на дебелина и дијабетес“, порача Мозафаријан.
Професорот по медицина Џорџ Л. Бакрис рече дека податоците се во согласност со наодите дека постарите лица, особено оние со дијабетес, срцеви и белодробни заболувања, имаат поголем ризик од развој на тежок облик на Ковид-19, пренесува WebMD.
