Мачнините или гадењето во бременоста се многу честа појава и еден од првите симптоми кај повеќето трудници. Тие се појавуваат во текот на првиот месец од бременоста, а во повеќето случаи исчезнуваат по 12 до 14 недели. Иако најчесто се зборува дека тоа се утрински мачнини, тие всушност може да се појават во било кое време од денот.
Точната причина за гадењето во бременоста не е со сигурност позната, но се смета дека хормоналните промени играат главна улога. Зголеменото ниво на хормонот бета хЦГ, кој го произведува плацентата, е поврзан со појавата на мачнини, но и зголемено ниво на хормоните естроген и прогестерон.
Така, на пример, се верува дека бремените жени кои носат девојчиња поради зголеменото ниво на естроген во организмот имаат посилни мачнини отколку жените кои носат момчиња.
КАКО ДА СИ ПОМОГНЕТЕ?
Иако е невозможно да се избегнат, симптомите на мачнини цо бременоста можете да ги ублажите за да ги направите барем малку поподносливи. Некои од тие начини се внимателно избирање на храната што ја внесувате во организмот, зголемен внес на течности, одржување физичка активност, престој на свеж воздух, редовно одморање, избегнување престој во зачадени простори, како и избегнување на какви било стресни ситуации.
Исто така, лекарите препорачуваат земање витамини и додатоци кои можат да помогнат да се намалат симптомите на гадење. Сепак, нагласуваат дека пред да земете какви било додатоци во исхраната, неопходно е да се консултирате со лекар за да се избегнат несакани последици.
