Се надеваме дека ќе успееме да испорачаме сигурна вакцина и ќе им дадеме заштита на адолесцентите, за да можат да се вратат на училиште во нормални услови
Фармацевтската компанија „Модерна“ соопшти дека денеска ја дала првата доза на вакцината во вториот дел од последната фаза на тестирање на кандидати кои припаѓаат на возрасната група помеѓу 12 и 18 години, објави Ројтерс.
Тестирањето се спроведува во соработка со Биомедицинското напредно истражувачко и развојно тело (БАРДА), кое е дел од Министерството за здравство на САД.
„Задоволство ни е да соопштиме дека го започнавме вториот дел од последната фаза на тестирање кај здрави адолесценти во САД. Нашата цел е да собереме доволно податоци до пролетта 2021 година, со што би се одобрила употребата на нашата вакцина во пресрет на новата учебна година“, изјави Стефан Бансел, извршен директор на „Модерна“, а пренесува „Бизнис Вајер“.
Тој додаде дека е охрабрен од прелиминарните резултати и анализите на третата фаза на тестирање кај постари од 18 години, додека тестирањето кај адолесцентите значително помага да се осигури безбедноста и ефективноста на вакцината кај помладата популација.
„Се надеваме дека ќе успееме да испорачаме сигурна вакцина и ќе им дадеме заштита на адолесцентите, за да можат да се вратат на училиште во нормални услови“, рече Бансел.
