Иако многу возрасни лица инстинктивно по првата средба со новороденчето веднаш брзаат да го бакнат на образ, чело или нос, лекарите тврдат дека тоа може да биде опасно по животот на бебето. Д-р Каран Раџан, кој на ТикТок споделува различни медицински совети, неодамна објасни зошто не се препорачува да се бакнува новороденче.
„Ќе се шокирате колку луѓе не го знаат ова, а информацијата е исклучително важна“, вели д-р Раџан на почетокот на видеото. Тој објаснува дека е важно да се почитуваат одредени правила кога имате мало дете или сте често во контакт со бебето и неговите родители.
Како што пишува „Хафингтон пост“, д-р Раџан во видеото потенцира дека е многу важно задолжително да ги измиете рацете пред да го допрете детето, но постои уште нешто на што мора да се обрне внимание.
Членовите на семејството и семејните пријатели треба да се воздржат од бакнување на бебето во првите два до три месеца, за имунолошкиот систем на детето да се зајакне во тој период
„Не го бакнувајте новороденчето, освен ако не сте родител или главен старател на детето,“ објаснува тој и додава дека дури и тогаш не би требало да го бакнувате бебето на чело ако сте болни или не се чувствувате добро. „Ова вклучува активни херпеси, дијареја и болести што предизвикуваат повраќање,“ додава тој.
Како причина за ова, докторот објаснува дека имунолошкиот систем на новороденчињата е сè уште во „фаза на надградба“ и не може да се спротивстави дури ни на лесни болести, како обичната настинка.
„Нивната крвномозочна бариера не е целосно развиена, така што дури и инфекции што предизвикуваат благи симптоми кај постарите деца и возрасните, како обичната настинка, можат да бидат опасни по живот за новороденчињата.“
Тој смета дека членовите на семејството и семејните пријатели треба да се воздржат од бакнување на бебето во првите два до три месеци, за имунолошкиот систем на детето да се зајакне во тој период.
Во коментарите на видеото, многу луѓе го пофалија она што го кажа, вклучувајќи и медицински сестри кои сметаат дека премалку луѓе знаат дека со своите добри намери можат да му наштетат на детето.
„Како бабица, ви благодарам на ова видео“, „Мразам кога гледам дека луѓето го прават тоа, а не знаат дека го загрозуваат детето. Или знаат, но не им е грижа, што е уште полошо“, „Имав строго правило никој да не смее да го бакнува моето бебе во првите месеци од животот. На постарите членови на семејството тоа не им се допадна, но ми е мило што бев упорна во тоа“, се само некои од коментарите.
