Расте бројот на настинки и вирусни инфекции. Како да знаете дали се работи за обична настинка, ковид или таканаречениот „супер грип“ – термин што се користи за грип што трае подолго или има потежок тек од вообичаеното. Лекарот Оскар Дјук за Би-би-си ги сподели главните совети како да се разликуваат симптомите и како да се избегне најлошото.
Дали постуденото време предизвикува настинки?
Истражувањата сè уште не се целосно јасни за тоа колку студеното време влијае на имунитетот. Но, пократките и потемни денови значат дека повеќе време поминуваме во затворени, топли простории, а тоа е идеално опкружување за ширење вируси.
Училиштата и градинките често се како „садови со култури“ – многу вируси кружат во групи, а децата лесно ги носат дома. Слично е и во студентските домови – многу дружење и споделување простор ја шири инфекцијата, а алкохолот и забавите дополнително го ослабуваат имунитетот.
Што е „супер грип“?
Британскиот NHS предупредува дека оваа сезона се очекува невообичаено тешка сезона на грип. Грипот пристигна еден месец порано од вообичаено, а циркулира и посериозен сој. Вакцините и понатаму добро делуваат против мутираната варијанта A (H3N2), која некои ја нарекуваат „супер грип“.
Дали е настинка, грип или ковид?
Настинка
- Симптомите се развиваат постепено.
- Најмногу го зафаќа носот и грлото.
- Ран знак може да биде чувство на притисок во ушите.
- Кашлица со многу слуз.
Грип
- Симптомите се појавуваат нагло.
- Чувство на потполна исцрпеност.
- Висока температура, болки во мускулите, замор.
- Потреба за одмор во кревет.
- Сувa кашлица.
Ковид
- Симптоми слични на грип.
- Губење на вкус или мирис.
- Пролив или желудочни тегоби.
- Кај новите варијанти (Stratus и Nimbus) – многу силна, „остра“ болка во грлото.
Многу симптоми се преклопуваат, но одредени знаци можат да помогнат да се препознае причината.
- Ако се работи за настинка, таа најчесто почнува полека.
- Го зафаќа носот и грлото, а кај некои се јавува и чувство на чешање во задниот дел од устата.
- Ран знак може да биде и чувство на притисок во увото.
- Ако вирусот се спушти подлабоко, може да предизвика упорна кашлица.
- Во повеќето случаи, настинката не ги спречува секојдневните активности.
Тоа не важи за грипот, кој често предизвикува висока температура, болки и изразена слабост. Грипот не ве „принудува“ да лежите, но токму така се чувствувате. По пандемијата, ковидот дополнително го отежнува разликувањето, бидејќи има многу сличности со грипот. Еден од клучните симптоми карактеристични за ковид е губење на мирис или вкус, а друг, типичен за новите варијанти, е исклучително силна болка во грлото. Чест е и проливот.
Препораката е да останете дома, да се одморате и да му овозможите на телото да оздрави. Ако имате хронични заболувања, ако се јави отежнато дишење или ако симптомите не поминат по три недели, треба да побарате совет од лекар.
