Научниците истакнуваат пет фактори кои се клучни за развојот на мозокот на новороденчето во текот на првата година од животот. Тоа се добра исхрана, стимулирачка средина, безбедно соседство, квалитетна нега и редовен циркадијален ритам и сон, според студијата на Универзитетот Вашингтон.
Додека претходните студии обезбедија докази за придобивките од овие поединечни развојни фактори, новото истражување се фокусира на нивната заедничка важност и како тие влијаат на развојот на мозокот во матката и во раното детство.
„Кога доенчињата ги имаат овие пет работи, нивниот мозочен развој, когниција и социјално-емоционален развој се подобруваат“, вели Џоан Луби, професор по детска психијатрија.
Во својата студија, проф. Луби и колегите испитувале 232 доенчиња и нивните мајки, фокусирајќи се на позитивните фактори во нивната околина за време на бременоста и во првата година од животот на бебињата. Тимот открил дека децата кои ги имале сите пет фактори на напредување, наречени и Т-фактори, се развивале здраво.
Клучно е дека студијата, исто така, открила дека дури и децата кои растат во неповолни услови може здраво да се развиваат ако се вклучени наведените фактори.
Иако генетиката игра улога во когнитивниот развој на новороденчето, истражувањата покажуваат дека нашето здравје е под големо влијание на нашата психосоцијална средина. Со други зборови, факторите на околината – како чувството на безбедност и добра ухранетост – исто така го обликуваат нашиот развој, можеби дури и повеќе од нашиот биолошки систем. Студијата е објавена во списанието JAMA Pediatrics.
