На здравјето, безбедноста и образованието на децата се мислело во сите земји кои донесуваа мерки со кои би се ограничило ширењето на пандемијата со новиот коронавирус, но притоа не треба да се заборави на универзалната детска потреба за стекнување самостојност, самоодредување и игра.
Колку е тоа важно, научниците од Универзитетот Флиндерс го објаснуваат во дел од поголемо истражување.
“Играта е клучен аспект на благосостојбата на децата од нивна перспектива“, вели главната авторка Џенифер Фејн. “Затворањето на игралиштата, градинките и училиштата, како и сеприсутниот страв и грижи поврзани со престојот на јавни простори, веројатно оставиле длабока трага на децата“.
Со постепеното враќање во училиште и градинка, посебно внимание треба да се посвети на потребата на децата да играат и да се ускладат со можностите во светот кој живее помеѓу попуштање на мерките и стравот од очекуваниот втор бран на пандемијата.
Пандемијата со КОВИД-19 влијае на сечија слобода, а особено на детската способност за бирање и одлучување. Ограничувањата наметнати со правила кои ги донесуваат возрасните никогаш не биле поочигледни.
“Во разговор со децата дознавме повеќе за тоа колку им значи слободата да се пробаат во нови работи и колку им значи играта“, вели Колин Мекдугал, професор по јавно здравје на Флиндерс и еден од авторите на истражувачкиот труд.
Додека целиот свет размислува за тоа како да ја стопира и спречи пандемијата, не смееме да заборавиме дека се што правиме остава трајни последици на најмладите.
Австралиското истражување би требало да помогне да се размисли за подобро планирање на следните потези.
Проф. Фејн чие истражување се фокусирало на комуникација со деца од предучилишна возраст, вели дека овој увид во детските размислувања треба да помогне да при воведувањето на идните ограничувања се размисли и за тоа како секоја наша одлука влијае на најмладите.
Треба да се слушне што ни зборуваат децата и нивните размислувања да се сфатат сериозно, велат научниците. Во прашање е нивната иднина.
