Поголемиот дел од потребата за сон децата ја исполнуваат во текот на ноќта, но што кога тој ритам ќе се наруши? Може ли тоа долгорочно да влијае на нивното здравје? Еве што за сето ова велат експерите.
“Во повеќето семејства, родителите, по напорниот ден, едноставно немаат енергија да се справат со тригодишно дете после 22 часот. И на родителите им е потребно време за себе“, вели Џудит Овенс, шеф на Клиника за нарушувања на спиењето кај децата.
Таа нагласува дека нема ништо лошо да им дозволите на децата да останат будни до доцна, но под еден услов, секоја вечер да си легнуваат во исто време и да спијат доволно.
“Времетраењето и уредниот циклус на спиење и будење се најважните фактори за квалитетен и мирен сон на детето“, вели таа.
КАКО ДА ЗНАЕТЕ ДАЛИ ДЕТЕТО ДОВОЛНО СПИЕ?
Понекогаш е тешко да се процени бидејќи уморните деца не мора да изгледаат уморно. Напротив, додека се борат против заспивањето, тие можат да станат многу поактивни и побудни од вообичаеното.
Но, еден од знаците кои укажуваат дека детето не спие доволно е тоа што заспива и при најкраткото возење во автомобилот. Триење на очите, раздразливост и агресивно однесување се други симптоми. Дете на кое му треба многу мотивација и стимулација за да профункционира наутро веројатно легнува предоцна и не спие доволно во текот на ноќта.
Тоа што детето се буди самостојно не е знак дека се наспало. Децата имаат ‘добро поставен’ внатрешен часовник, па некои ќе се разбудат во времето на кое се навикнати, без разлика кога си легнуваат. Недостатокот на сон може да доведе и до немирен сон и прерано будење.
КАКО ДА ГИ НАТЕРАТЕ ПОРАНО ДА СИ ЛЕГНАТ?
Експертите предупредуваат дека колку подолго трае овој доцен ноќен образец, толку ќе биде потешко да се промени. Затоа, важно е постепено да се воведуваат промени. Ако детето е навикнато да си легнува во 22 часот, не чекајте вечерта пред првиот ден пред градинка или училиште за да го легнете околу 20 часот.
За децата, сонот е важен за нормален ментален и физички развој, но исто така им обезбедува доволно енергија, им помага полесно да ги совладаат когнитивните содржини и им го обезбедува доброто расположение.
Според Американската академија за педијатрија, на децата на возраст од 2 до 3 години им требаат 9 до 13 часа сон секоја вечер, на децата на возраст од 3 до 5 години им требаат 10 до 12 часа сон, а на возраст од 5 до 12 години им требаат најмалку 8 часа сон.
Доколку сакате да ги промените навиките за спиење на вашето дете, еве што советуваат експертите.
- Поместете го времето за спиење на детето за 15 минути на секои два до три дена.
- Како што се приближува времето за спиење, намалете го интензитетот на светлината во станот и исклучете ги екраните.
- Избегнувајте активности пред спиење, вклучувајќи немирно играње, гледање телевизија и користење видео игри. Заменете ги за тивки, смирувачки ритуали: чаша топло млеко, капење и приказна за добра ноќ.
