Децата со вишок килограмии имаат склоност помалку да спијат во споредба со своите врсници кои имаат нормална телесна тежина, покажува најнова студија. Овие резултати, објавени во списанието Archives of General Psychiatry, додаваат докази на фактот дека недоволниот сон може да придонесе до појава на вишок килограми кај адолесцентите и децата. Тие исто така први опишале дека РЕМ фазата на сонот може да биде особено важна во контролата на телесната маса.
РЕМ фазата на спиење (“rapid eye movement“, или т.н. брзи движења на очите), е состојба во која вообичаено се случуваат живописни соништа. Истражувачите, исто така сугерирале дека метаболизмот во сонот е највисок за време на РЕМ фазата во споредба со останатите фази од спиењето и дека недостаток на РЕМ спиење може делумно да биде делумно предизвикан од промените на хормоните кои го зголемува апетитот.
За оваа студија истражувачите од Универзитетот во Питсбург следеле 335 деца и адолесценти, кои три ноќи по ред, поминале во лабораторија за спиење. Децата носеле електроди кои ги бележеле мозочните активности и останатите физиолошки функции за време на сонот.
Истражувачите откриле дека во просек, децата со вишок килограми спиеле 22 минути пократко од децата со нормална телесна маса. Исто така, ним им било потребно подолго време да влезат во РЕМ фазата и во неа поминувале помалку време.
Во студијата е опишано дека секој час помалку од вкупното време на спиење, значи двојно поголема шанса детето да има вишок килограми. Ризикот поврзан со РЕМ фазата е уште поголем – за секој изгубен час од оваа фаза, шансите за добивање вишок килограми се тројно поголеми.
„Ова е прва студија која информира дека РЕМ фазата во спиењето најсилно е поврзана со вишокот килограми кај децата„, истакнале д-р Хианшен Лу и колегите.
Тимот истражувачи опишале дека постојат докази оти лошиот сон има хормонални ефекти кои би можеле да доведат до зголемување на телесната маса, вклучувајќи намалување на хормонот кој го потиснува чувството за глад – лептин и зголемување на хормонот кој го поттикнува чувството на глад – грелин.
За РЕМ фазата веќе е докажано дека метаболички е најактивна фаза во спиењето и намалувањето на истата го намалува нивото на ноќно топење на калориите. Некои истражувачи упатуваат на тоа дека лептинот, грелинот и останатите хормони особено се чувствителни на промените во РЕМ фазата.
Која и да е причината на поврзаноста помеѓу РЕМ спиењето и телесната тежина кај децата, добриот ноќен сон е особено важен, истакнуваат истражувачите. Тие препорачуваат децата од 5 до 12 години да спијат 10 до 11 часа, а тинејџерите 8,5 до 9,5 часа.
