Понекогаш се случува мало дете, сосема изненадно, да почувствува силни болки во нозете. Нема видливи повреди, оток, црвенило, но детето неутешно плаче и се жали на силни болки во нозете. Болката може да биде толку силна што ќе го разбуди детето од сон и таквото ноќно будење може да биде доста драматично.
Лекарите можеби во целост не ги разбираат болките при растење, но знаат како да ги спречат и лекуваат кога децата се мачат.
Непознати причини
На почетокот, повеќето родители мислат дека нивните деца само сакаат дополнително внимание, особено во текот на ноќта.
„На околу шест години, по неколку часа откако ќе заспиеше, почнуваше да се жали на болки во нозете. Мислев дека само му треба дополнително внимание, но кога почна да се буди во солзи, внимателно погледнавме што се случува“, раскажува една мајка.
До 40 проценти од децата на возраст од 3 до 12 години доживуваат болки во мускулите во одреден момент, но вистинските причини не се познати. Нема докази дека болката е поврзана со наглиот раст, а обрасците на раст на децата кои ги доживуваат не се разликуваат од оние кои не ги доживуваат. Болките единствено може да се поврзат со висок интензитет на физичка активност во текот на денот.
Каде децата чувствуваат болка?
Болката обично се опишува како чувство на пулсирање, а може да се почувствува во потколениците, листовите, предниот дел на бутовите или зад колената. Почести се во доцните попладневни и вечерни часови, а можат да ги разбудат и децата од сон. Болките на раст, како што се нарекуваат и, обично се чувствуваат во двете нозе.
Овие болки дефинитивно може да се ублажат, а понекогаш и да се спречат. Родителите може да се обидат да ги масираат нозете или да ги третираат болните места со термофор или топли облоги. Вообичаено, малку топлина и нежна масажа ќе ја смират болката, а детето ќе заспие.
Некои сметаат дека топла бања и истегнување пред спиење, како што е кучешката поза во јога, може да помогне да се спречат „болките на растење“. Вежбањето можеби нема да помогне веднаш, но ако вашето дете поминува низ период на чести болки, обидете се. Во случај на силна и вознемирувачка болка, во ред е да му дадете на детето аналгетик, ибупрофен или парацетамол. Меѓутоа, консултирајте се со педијатар.
Кога родителите треба да се загрижат?
Ако болката постојано ја зафаќа едната нога или ако има неодамнешна повреда, задолжително посетете лекар. Други знаци кои не треба да се занемарат се „куцање“, црвенило, оток, модринки, осип, треска или болка која трае и втор ден. Болките во растењето не треба да влијаат на нивото на активност на детето.
Иако пречат и го прават детето раздразливо, болките при растење се нормални. Повеќето деца целосно ги надминуваат до 12 или 13 години.
