Некои бебиња родени од мајки заразени од коронавирус веќе имаат антитела против вирусната болест, откри еден од најдобрите лекари во Велика Британија
♦♦♦♦♦♦♦
Д-р Патрик О’Брајан, потпретседател на Кралскиот колеџ за акушери и гинеколози, рече дека „многу мал“ број на новороденчиња изгледа дека развиле имунолошки одговор против вирусот додека биле се уште во матката.
Антителата се супстанции продуцирани како одговор на инфекција, кои се чуваат од страна на имунолошкиот систем за борба против истиот вирус, доколку се врати во иднина. IgM – антителата кои телото ги создава кога за прв пат се заразува со вирусот, не можат да се пренесат од мајката на детето преку плацентата, што значи дека бебињата мора да ги развиле самостојно, велат научниците.
IgM – антителата се формираат рано и во суштина го поттикнуваат имунолошкиот систем да го уништи вирусот, додека други видови – главно IgG антитела – ги чуваат „спомените“ за да нападнат после многу години откако некој ја имал болеста.
Ова сугерира дека мајките ја пренесуваат животозагрозувачката болест на нивните неродени деца во матката, теорија за која се расправа за време на целата криза.
Пораката од оваа студија е дека оваа инфекција сè уште, барем колку што можеме да кажеме во моментот, не изгледа полошо за бремените жени отколку што е за другите
Некои експерти претходно расправаа дека бебињата со Ковид-19 го фатиле вирусот од своите мајки по раѓањето, или од заразена бабица или доктор во болницата.
Откритието е дел од првата голема студија на Велика Британија за ефектот на коронавирусот врз идните мајки, во која беа разгледани 427 жени заразени со оваа болест низ целата земја.
Објавувајќи ги наодите на виртуелна прес-конференција, д-р О’Брајан рече: „Пораката од оваа студија е дека оваа инфекција сè уште, барем колку што можеме да кажеме во моментот, не изгледа полошо за бремените жени отколку што е за другите“.
Д-р О’Брајан рече дека 10% од жените во студијата се разболеле сериозно и морале да бидат ставени на респиратор, што е слично на стапката кај општата популација. „Едно од 20 (пет проценти) од бебињата биле тестирани позитивно на вирусот, но сите „биле добри“, откри тој.
Тој рече дека „најверојатно“ повеќето од овие деца го фатиле вирусот преку плацентата на нивните мајки. Но, докторот исто така, додаде дека не може да ја исклучи можноста некои од нив да се заразиле од родителот или бабицата, по раѓањето.
„Многу мал број на бебиња во сопствената крв имаа IgM антитела против овој вирус. Знаеме дека IgM не ја преминуваат плацентата… па ова навистина би сугерирало дека бебињата развиле имунолошки одговор против вирусот додека се уште биле во матката. Мислам дека сега се наоѓаме во ситуација кога се чини веројатно или барем возможно вирусот преку плацентата да премине на детето. Но дури и тоа да успее, станува збор за мал дел на бебиња и ниту едно од тие бебиња не е сериозно погодено од инфекцијата“.
Истражувањето е објавено во British Medical Journal. (Дејли мејл)
