♦♦♦♦♦♦♦
Третманот на лица заразени со коронавирус најверојатно бара комбинирање на антивирусни, противвоспалителни и други лекови со индивидуално прилагодена терапија на секој пациент, е мислењето на тимот на експерти од Управата за храна и лекови на САД (FDA).
„Бидејќи се повеќе резултати од клинички испитувања постепено стануваат достапни за научниците, станува се појасно дека веројатно нема само еден магичен пристап за лекување на пациентите со Kовид-19 и мора да применуваме комбинација од неколку мерки кои ќе делуваат на клучните фактори на Ковид-19“, напишаа научниците Монтсерат Пуиг и нејзините колеги во извештајот објавен во списанието „Frontiers of Immunology“.
„Сè додека не станат достапни вакцината и лековите наменети за лекување на Ковид-19, веројатно ќе треба индивидуално да ја прилагодиме терапијата кон секој пациент. Досегашната пракса ни покажува дека SARS-CoV-2 различно делува на различни пациенти и дека на исходот на болеста влијаат бројни фактори“, истакнуваат авторите на студијата, пренесува Си-Ен-Ен.
Истражувањето, кое опфати проучување на 30 различни лекови користени досега, упатува на заклучокот дека различни терапии би можеле да бидат ефективни во различни фази на болеста.
Во раните фази на болеста, веројатно би било доволно да се примени лекување чија цел е спречување на навлегување на вирусот во клетките, како и негово размножување, вели Пуиг, додавајќи дека кај пациенти со потешки симптоми на болеста би било поважно и поефикасно да се засили реакцијата на имунолошкиот систем во борба против вирусот.
Засега не е одобрен ниту еден лек како терапија наменета исклучиво за лекување на инфекцијата со коронавирус, иако Управата за храна и лекови на САД (FDA) дозволи употреба на антивирусниот лек ремдесивир во итни случаи. (Хина)
