Д-р Рахул Џандијал, неврохирург, татко и автор, објаснува на што родителите треба да се фокусираат кога станува збор за здравјето на мозокот на нивните деца. Осврнувајќи се на дваесет години родителство и паралелниот напредок во познавањето на човечкиот мозок, Џандијал го споделува својот пристап во воспитувањето на трите сина.
Иако раните грижи, како опасностите од гушење или давење, со текот на времето поминале, како и секој родител тој и понатаму се грижи за безбедноста на своите деца. Но, како неврохирург, особено внимание посветува на заштитата на нивниот мозок.
Каква е нивната исхрана?
Исхраната влијае на умот и мозокот, но не на начинoт на кој тоа често се прикажува преку приказни за „суперхрана“. Џандијал се фокусира на основите: секојдневно треба да се јаде нешто од растително потекло, како овошје, а секоја недела и риба – на пример, лосос двапати неделно.
Тој смета дека, дури и ако остатокот од исхраната не е совршен, антиоксидантите од овошјето и омега-3 масните киселини од масната риба се клучни за здравјето на мозокот.
Дали се оддалечуваат од телефоните?
Наместо строго да го ограничува времето поминато пред екраните – бидејќи децата ги користат и за учење и училишни обврски – Џандијал ја нагласува важноста на периоди на целосен одмор од екраните.
Тој инсистира неговите синови еден до два часа пред спиење да не користат телефони. Ова му овозможува на умот слободно да „лута“, активирајќи мозочни патишта кои инаку би останале неискористени. Таквото размислување е корисно по активен ден и помага за полесно заспивање.
Дали се забавуваат секојдневно?
Џандијал ја истакнува важноста на рамнотежата. „Не сакам роботи со премногу цели, но исто така не сакам ни забавувачи кои ништо не завршуваат“, вели тој.
Според него, и работата и забавата се неопходни за личниот и психолошкиот развој, а клучот е во пронаоѓањето баланс меѓу обврските и уживањето.
Дали секојдневно учат нешто ново?
Во неговото семејство постои мал ритуал: некој споделува линк, видео или текст што може да биде добра тема за разговор. Според Џандијал, ова го одржува семејството поврзано и му нуди на мозокот нови содржини за интелектуален и креативен раст.
Како пример наведува неодамнешен разговор за текст во кој се тврдеше дека кучињата можат да намирисаат одредени видови рак кај луѓето – информација што ги изненадила неговите деца.
Какво е нивното ментално здравје?
Тинејџерските мозоци, како што вели тој, се „бура од нови мозочни врски кои сè уште не се целосно усогласени со емоциите“.
Тој е загрижен дали неговите деца развиваат ефикасни стратегии за справување со стресот, прекините во врските и влијанието на социјалните мрежи. Иако е тешко да се понуди конкретна формула, Џандијал нагласува дека најважно е родителите да бидат присутни и да им дадат поддршка на своите деца.
