Коронавирусот кој резултира со развој на КОВИД-19 постојано мутира ширејќи се во светот, но се чини дека ниту една од моментално воочените мутации, не овозможува уште побрзо ширење, објавија вчера научниците од Институтот за генетика на Универзитетот во Лондон (UCL).
Во студија која ги користела глобалните податоци за геномите на вирусот кај 46.723 лица заболени од КОВИД-19 од 99 земји, научниците откриле над 12.700 мутации на вирусот SARS-CoV-2.
“За среќа, откривме дека ниту една од овие мутации не влијае на уште побрзо ширење на КОВИД-19. Сепак мора да бидеме многу внимателни и продолжиме со следење на тие нови мутации, особено во момент кога постапно се воведуваат вакцини“, вели Луси Ван Дорп, професор на лондонскиот Инститит и еден од главните истражувачи во студијата.
Познато е дека вирусите постојано мутираат, а некои како вирусот на грип, се менуваат и почесто од останатите.
Но, добро е што повеќето мутации се неутрални. Треба да се истакне дека некои меѓу нив може да бидат корисни, а други штетни за вирусот, а посебно е важно да се води сметка за тоа дека некои вакцини може да ги направи помалку ефикасни, велат научниците. Кога вирусите се менуваат во оваа насока, вакцините мора редовно да се прилагодуваат со цел да се загарантира дека успешно ќе ги уништат.
