Есента носи постудени денови, но родителите и старателите знаат дека тоа воедно значи и почеток на сезоната на кашлање, кивање и затнати носови. Респираторните вируси, како настинка и грип, тогаш почнуваат да кружат низ училиштата и градинките, а ново истражување го потврдило она што многу родители одамна го знаат – најмалите деца ги шират вирусите најмногу.
Студија објавена во списанието Pediatrics покажала дека децата на возраст од три до десет години почесто пренесуваат респираторни вируси отколку постарите ученици и училишниот персонал. Педијатарката д-р Џенифер Голдман, една од водителките на истражувањето, објаснила дека малите деца можат да прележат и до десет респираторни инфекции годишно, бидејќи нивниот имунолошки систем првпат се среќава со многу вируси.
Истражувачите анализирале примероци и симптоми на повеќе од 800 ученици и вработени во училиштата во периодот од ноември 2022 до мај 2023 година. Се покажало дека повеќе од 85 проценти од сите учесници имале барем една респираторна инфекција. Најмалите деца, на возраст од три до пет години, имале дури 92 проценти позитивни резултати на вируси, кај децата од 11 до 13 години тој број бил 86 проценти, а кај средношколците 77 проценти.
Најчесто се работело за риновирус – предизвикувач на обичната настинка – кој бил пронајден кај 65 проценти од учесниците. Вирусот ковид-19 бил откриен кај околу 15 проценти од испитаниците.
Педијатрите потврдуваат: Најмалите најмногу ја шират болеста
Резултатите од истражувањето ја потврдуваат и секојдневната практика на лекарите. Д-р Никол Торес, педијатарка и мајка, вели дека нејзините деца биле многу почесто болни кога биле помали. Истражување од 2015 година на Универзитетот во Јута покажало слични резултати – децата под пет години имале вирус во организмот во текот на половина година.
„А ако имате повеќе деца дома, секогаш некој е болен,“ рекла една од авторките на студијата, д-р Кери Бајингтон.
Како да се заштитите од вируси
Стручњаците истакнуваат дека целосно спречување на болести кај децата е тешко, но постојат чекори што можат да помогнат. Се препорачува редовна вакцинација против грип, темелно миење раце, покривање на устата при кашлање и избегнување допирање на лицето. Важно е и редовно чистење на површините и проветрување на просториите.
Ако детето сепак се разболи, најдобриот третман е одмор и многу течности. Во потешки случаи можат да се дадат лекови за намалување на температурата или антивирусни лекови, ако ги препорача лекар. Кашлицата, сепак, често трае со недели, а детето во меѓувреме може повторно да се разболи.
„На родителите на мали деца им велам да очекуваат болест отприлика на секои еден до еден и пол месец,“ рекла д-р Торес. „Така изгледа во пракса.“
