Грашокот се воведува во исхраната на бебето помеѓу 6. и 8. месец од животот. Како и секогаш, се препорачува да се консултирате со вашиот педијатар за воведувањето нови намирници во исхраната на бебето.
Грашокот е одличен избор за прва “зелена“ храна за бебето оти е хранлив и главно пријатен за јадење, оти има слаткаст вкус. При подготовка на домашни кашички од грашок можеби ќе ви биде тешко да добете мазно пире поради лушпите. Ако е така, и мислите дека тие може да му пречат на бебето, добиеното пире процедете го низ цедалка или сито.
Како да го одберете и чувате грашокот?
Грашокот е една од 15 намирници кои се најмалку загадени со пестициди и затоа не е потребно да се купува органски. Надворешната лушпа на самиот грашок му обезбедува заштита од пестициди.
При купување на свеж грашок, барајте големата лушпа да биде светло зелена боја и со свеж изглед. Купувајте средни, не големи парчиња грашок. Избегнувајте ги оние со дебела кожа, оти тоа е показател дека грашокот е презреан.
Грашокот може да се чува во замрзнувач до четири месеци. Замрзнатиот грашок е ист како свежиот и губењето на хранливи материи при процесот на замрзнување е во мал процент.
