Окситоцинот е многу важен хормон, оти делува на создавањето социјални односи и врски помеѓу луѓето. Помага да создадеме блискост, ја јакне довербата, врските. Неговото лачење може да биде поттикнато од контакт со очи, емпатија или допир.
Познато е дека нивото на окситоцинот кај мајките влијае на нивното однесување, што потоа создава поврзаност со бебето. Нова студија покажала дека однесувањето на мајката може да влијае на нивото на окситоцин кај бебето.
“Познато е дека окситоцинот активно влијае на раните социјални, перцептуални и когнитивни процеси, а тоа влијае на комплекс на социјално однесување. Во оваа студија испитувавме дали однесувањето на мајката може да влијае на развојот на самиот бебешки систем одговорен за окситоцин. Предностите на молекуларната биологија, поточно епигенетиката, овозможија да ја истражиме интеракцијата на природата и негата, во овој случај, детската“, изјавил Тобијас Гросман, еден од авторите на истражувањето.
Научниците ја набљудувале интеракцијата на мајка и петмесечно дете.
“Собиравме примероци плунка, како на бебето, така и на мајката, и потоа повторно ја правевме истата постапка, кога бебето имаше 18 месеци. Рецепторот на окситоцин е клучен за искажување на неговите ефекти, а гените може да одредат која количина ќе се лачи“, објаснува Гросман.
Според авторите, забележана е епигенетска промена во ДНК на детето, а таа промена може да се предвиди на основа на квалитетот на играта на мајката со детето и блискоста. Доколку мајката било повеќе вклучена во играта со детето, се јавувала поголема редукција на метилацијата (неактивност) на ДНК рецепторот на окситоцин во текот на една година.
