Одобрените вакцини против COVID-19 се докажано ефикасни (создаваат позитивен имунолошки одговор) и безбедни (штетните последици на вакцината се минимални)
Група хрватски научници и лекари, 30 на број, предводени од Иван Џикиќ, испратија отворено писмо до јавноста во врска со вакцината против COVID-19. Со писмото, како што велат, сакаат да и укажат на пошироката јавност за важноста на вакцинацијата против оваа опасна болест, пренесува „Индекс.хр“.
Придобивки од вакцинацијата
Вакцинацијата е најефективниот начин да се спречи ширењето на вирусот со цел да се заштити здравјето на што повеќе луѓе. Тоа е докажано на бројни болести до денес, вклучувајќи сипаници, детска парализа, како и сезонски грип. Несакани ефекти кај одобрена вакцинација се ретки и се значително помала опасност од симптомите и компликациите на самата болест.
Заканата што ја претставува COVID-19 во следните месеци
SARS-CoV-2 е опасен и многу заразен вирус. Иако вирусот првенствено го инфицира респираторниот систем, тој може да се прошири и на други органи и ткива. Вирусот е најопасен за постарите лица, бидејќи во оваа возрасна група значителен број на пациенти (> 10%) развиваат тешка клиничка слика или умираат од последиците од инфекцијата. Клиничката состојба на заразените лица може да се влоши неочекувано и многу брзо. Фактот дека помладите луѓе најчесто не развиваат тешки симптоми не е причина лесно да се сфати заканата од овој вирус за целокупното население. Помладите лица можат да ги заразат своите родители, баби и дедовци и пријатели и да предизвикаат сериозна болест или смрт. Конечно, и некои од нив ќе развијат потешка или критична форма на болеста.
Вакцината го активира имунолошкиот систем и го „учи“ да го препознава вирусот на безбеден начин. Затоа делува како „лажна“ инфекција, која помага да се изгради имунитет против коронавирусот SARS-CoV-2, но може да предизвика и минливи непријатности. Многу несакани ефекти како што се локално црвенило, покачена телесна температура и замор се всушност нормални последици по секоја вакцинација или очекуваното активирање на имунолошкиот систем
Правилната вакцинација обезбедува заштита од инфекција на поединците, а вакцинацијата на популацијата може да доведе до создавање на колективен имунитет. Од овие причини, но и поради недостаток на поефикасна терапија, сметаме дека вакцинацијата против Ковид-19 е најдобриот начин за заштита на луѓето. Затоа, сакаме да нагласиме дека без вакцинација (како и без почитување на епидемиолошките мерки), оваа пандемија нема да исчезне, туку ќе трае подолго и ќе предизвика дополнителни човечки и економски загуби за граѓаните на Хрватска.
Ригорозни правила за испитување на вакцините
Со огромни глобални напори и брз напредок во технологијата, развиени се повеќе вакцини против болеста COVID-19, кои во моментов се подложени на ригорозни испитувања за ефикасност и безбедност. Нашата доверба во овие вакцини се заснова на резултатите од научните испитувања спроведени врз десетици илјади луѓе и се предмет на ригорозни контроли на регулаторните тела. Спроведувањето на споменатите клинички студии се заснова на правилата на медицинската и научната заедница и регулаторните агенции, а не на производителите на вакцини. Производителите мора да се придржуваат до строгите правила при тестирање на ефикасноста и безбедноста на вакцините, а должни се да ги достават сите податоци за испитувањата на независни панели на стручњаци во регулаторните агенции. Правилата се исти за сите вакцини што се тестираат, без оглед на технологијата што ја користат.
Клиничката состојба на заразените лица може да се влоши неочекувано и многу брзо. Фактот дека помладите луѓе најчесто не развиваат тешки симптоми не е причина лесно да се сфати заканата од овој вирус за целокупното население. Помладите лица можат да ги заразат своите родители, баби и дедовци и пријатели и да предизвикаат сериозна болест или смрт
Конечно, сите резултати мора да бидат транспарентни за да бидат достапни на јавноста. Дури по ригорозна проценка од страна на регулаторните агенции за лекови, вакцината се одобрува за широка употреба. Откако ќе се одобри вакцината, продолжува следењето на сите ефекти на вакцинација и можните нуспојави.
Вакцините против Covid-19 се развиени побрзо од која било вакцина во историјата
Го разбираме интересот на јавноста и прашањата за лекот што се пушта на пазарот многу побрзо отколку што беше досега за сличен производ. Главните причини зошто целиот процес се развил со таква брзина се научниот и технолошкиот напредок, соработката помеѓу лекарите и научниците и огромните инвестиции на фармацевтската индустрија и владите, што овозможи тестирање на голем број луѓе за кратко време. Вообичаено, фармацевтските компании ги сносат сите трошоци за развој на лековите, но овој пат и владите презедоа дел од финансиските обврски со цел што побрзо да се развијат вакцини и да се запре пандемијата. Друга особеност што влијаеше на брзиот развој на вакцината: поради брзото ширење на инфекцијата, можно е брзо да се утврди меѓу волонтерите вклучени во клиничките испитувања дали вакцината е ефикасна или не.
Вакцините против COVID-19 се безбедни за широка употреба
Многу луѓе се неодлучни дали да се вакцинираат или не поради можни несакани ефекти. Важно е да се разбере дека вакцината го активира имунолошкиот систем и го „учи“ да го препознава вирусот на безбеден начин. Затоа делува како „лажна“ инфекција, која помага да се изгради имунитет против коронавирусот SARS-CoV-2, но може да предизвика и минливи непријатности. Многу несакани ефекти како што се локално црвенило, покачена телесна температура и замор се всушност нормални последици по секоја вакцинација или очекуваното активирање на имунолошкиот систем, но тие не се сметаат за тешки нуспојави. Но, за да се сведе на минимум ризикот од сериозни несакани ефекти, се спроведуваат обемни и строго контролирани клинички студии врз десетици илјади волонтери. Дури и по одобрувањето на вакцината, употребата на вакцината постојано се следи од регулаторните тела, а во случај на посериозни несакани ефекти, вакцинацијата се ограничува или се запира. Затоа, ризикот од сериозни несакани ефекти е неспоредливо помал од компликациите како резултат на болеста COVID-19 за секоја возрасна доба.
Зошто треба да се вакцинирате против COVID-19?
Одобрените вакцини против COVID-19 се докажано ефикасни (создаваат позитивен имунолошки одговор) и безбедни (штетните последици на вакцината се минимални).
Поединци кои би можеле негативно да реагираат на вакцинацијата може да се идентификуваат и исклучат од програмата за вакцинација.
Со вакцинирање, ќе се заштитиме себеси и нашите најблиски од последиците од болеста COVID-19
Ние сите ќе се вакцинираме со достапни вакцини според службените редоследи и приоритети во нашите средини.
Заклучок
Врз основа на ригорозните тестирања кои се спроведуваат пред да се пуштат вакцините во употреба, а според ригорозните правила на медицинската и научната заедница и регулаторните агенции, уверени сме дека сите одобрени вакцини против COVID-19 ќе бидат ефикасни и безбедни и дека ризикот од нивни посериозни несакани ефекти ќе биде сведен на минимум. Затоа, како научници и членови на здравствената заедница, едногласно ја поддржуваме и препорачуваме вакцинацијата против COVID-19, според усогласен распоред и приоритети, како би се заштитиле од можни тешки последици од болеста, се вели во писмото потпишано од 30 научници.
Потписниците на писмото на крајот напоменуваат дека немаат никаков материјален интерес од фармацевтските компании кои произвеле вакцини против COVID-19.
