Родителите го сакаат најдоброто за своите деца, но понекогаш премногу мешање може да има негативно влијание врз нив. Професорот од Харвард и експерт за среќа Артур Брукс неодамна откри грешка што ја прават родителите кога е во прашање среќата на нивните деца. Тој посочува дека проблемот е што родителите не дозволуваат нивните деца да бидат несреќни.
„Често забележувам дека родителите се премногу исплашени поради тоа што нивните деца се несреќни. Хеликоптер родителите се избезумени поради ова и претерано размислуваат за чувствата на своите деца“, вели Брукс.
Тој објаснува дека родителите често се обидуваат да ги „избришат“ лошите чувства, што е голема грешка и истакнува дека децата мора да учат и растат, а тешките емоции се дел од тоа.
Кога добронамерните родители ги штитат децата од последици, како на пример да им ја завршат домашната задача за да не се најдат во неволја на училиште, тие им ја ускратуваат можноста да бидат независни. На родителите не им е лесно да се повлечат и да ги остават децата сами да се справат со проблемите. Сепак, тоа е многу важно за нивниот развој и може позитивно да влијае врз нив во иднина. Емоциите може да бидат предизвикувачки, но важно е да им се дозволи на децата да ги изразат и искусат.
