Овие откритија сугерираат дека имунитетот би можел да трае со години, а можеби и цел живот кај луѓето кои биле заразени, а подоцна вакцинирани. Сепак, научниците сè уште не се сигурни дека истата ситуација е можна кај луѓето кои стекнале имунитет само преку вакцинација
Научниците веруваат дека на повеќето луѓе кои примиле една од mRNA вакцините против коронавирус на „Фајзер“ или “Модерна“, нема да им треба трета доза, но под услов да не се појават значителни мутации кај новите соеви – што не е загарантирано, пишува „Њујорк тајмс“.
„Резултатите од студијата ни покажуваат колку е долготраен имунитетот стекнат со вакцинација“, изјави за „Њујорк Тајмс“ Али Елебеди, имунолог од Универзитетот во Вашингтон во Сент Луис, кој го водеше истражувањето.
Студијата, којашто е објавена во списанието „Nature“, не се занимавала со вакцината „Џонсон и Џонсон“, но Елебеди очекува дека имунитетот после таа вакцина сепак ќе биде послаб од оној што го пружаат mRNA вакцините на „Фајзер“ и „Модерна“.
Во минатиот месец, Елебеди и неговите колеги објавија дека клетките кои го препознаваат вирусот се задржале во коскената срцевина најмалку осум месеци по инфекцијата со коронавирус. Друг тим на истражувачи истовремено откри дека мемориските лимфоцити B продолжуваат да созреваат и да јакнат најмалку една година по инфекцијата.
Овие откритија сугерираат дека имунитетот би можел да трае со години, а можеби и цел живот кај луѓето кои биле заразени, а подоцна вакцинирани. Сепак, научниците сè уште не се сигурни дека истата ситуација е можна кај луѓето кои стекнале имунитет само преку вакцинација.
