Како што се приближува вечерта, сите родители имаат една желба – детето што побрзо да заспие и да спие квалитетно. Особено кога знаеме дека нè чека „нашето време“, кое сакаме да го искористиме како било – дури и ако тоа значи само гледање телевизија. Се разбира, можеме малку да се пошегуваме на оваа тема, никој нема да се налути, а сите знаеме дека, без разлика на шегата, вистината е тука некаде… Сите сакаме децата навреме да си легнуваат и нивниот сон да биде добар.
Клучот за тоа можеби се крие во вечерата, односно во храната што ја консумираме пред спиење. Иако некои сметаат дека овошјето не е најдобар избор за вечерен оброк, се чини дека постојат одредени видови овошје кои можат да придонесат за подобар и поквалитетен сон. Нема да кажеме дека нема да пробаме – на крајот на краиштата, не може да наштети, нели? Советите за избор на овошје ги сподели експертот за спиење Макс Кирстен.
Еве што би можело да им понудите на малечките за подобар сон.
Банани
Иако оправдано се смета дека бананата дава енергија, па затоа често ја јадат спортисти кога им е најпотребна, таа има и друга улога. Кога се консумира пред спиење, може да делува слично како мелатонин и да помогне за поквалитетен сон. Бананите се богати со магнезиум и калиум, кои ги опуштаат мускулите, како и со триптофан, кој во телото се претвора во серотонин и помага во смирување на мозокот. Среќа што бананите се на врвот на листата омилено овошје кај децата!
Ананас
Ананасот содржи мелатонин, витамин Ц, магнезиум и растителни влакна – сите тие можат да помогнат во регулирањето на циклусот на спиење и будење. Исто така содржи и бромелаин, кој благодарение на своите противвоспалителни својства помага во опуштање на мускулите и може да го олесни заспивањето. А детските денови знаат да бидат навистина напорни…
Портокали
И кај портокалите главната улога ја има витаминот Ц. Покрај тоа, природните шеќери во ова сочно овошје можат краткорочно да му дадат поттик на телото и умот непосредно пред спиење, за потоа полесно да се опуштат. На пример, нешто како последно скокање по креветот пред да потонат во сон.
Киви
Кивито е богато со витамин Ц и го поттикнува создавањето на серотонин. Витаминот Ц и зголеменото ниво на серотонин придонесуваат за опуштање и го прават совршен оброк пред спиење. Многу деца не го сакаат поради неговиот специфичен, киселкаст вкус, но ако го сакаат – слободно нека уживаат!
Јаболка
Растителните влакна и природните шеќери во јаболката можат да помогнат во избегнување на несоница – или како и да го нарекуваме оној момент кога децата одбиваат да си легнат. Истовремено, тие помагаат во стабилизирање на нивото на шеќер во крвта и во подобрување на општото расположение. А можеби токму тоа ќе ги убеди полесно да тргнат кон креветот.
