Родителите често се загрижени затоа што нивните деца спијат лошо, особено ако се под една година. Педијатарката д-р Рејчел И. Мун многупати во својата кариера одговарала на прашања на родителите на оваа тема, а за Chicago Tribune открила што советува во вакви ситуации. Таа истакнува два начини на кои родителите и старателите можат да поттикнат здрав сон кај децата.
Држете го бебето будно за време на хранењето
Кога го држите вашето бебе будно во текот на хранењето, му овозможувате само да заспие, што помага да се воспостават добри навики за спиење, објаснува педијатарката.
„Поспано бебе можете да го држите будно така што нежно ќе го галите по образот или ќе му зборувате и пеете додека го храните. Потоа вратете го во креветчето додека сè уште е поспано“, вели Мун.
Таа ја истакнува важноста на оваа практика, нагласувајќи го нејзиниот позитивен придонес во формирањето на здрави навики за спиење кои придонесуваат за стабилноста и квалитетот на сонот на нашите најмали на долг рок.
Не брзајте кон бебето веднаш штом ќе го слушнете како плаче
На родителите им се советува да почекаат неколку минути откако бебето ќе се разбуди за да видат дали повторно ќе заспие самостојно, што често и е случај. Овој пристап промовира самостојност во процесот на заспивање на детето, а во исто време им дава можност на родителите да го следат однесувањето и потребите на детето пред да интервенираат.
Во клиниката каде што работи, педијатарката и нејзиниот тим се сретнале со родители кои мислеле дека во нив е грешката бидејќи не им било јасно зошто нивното бебе одеднаш се буди среде ноќ.
„Фазите на ноќното будење доаѓаат и поминуваат во првите неколку години од животот на бебето, често без никакво објаснување“, потенцира Мун.
Плачењето може да биде предизвикано од развојот
„Кога бебињата се здрави, нахранети и им е удобно, нивното плачење може да значи дека поминуваат низ мали развојни проблеми, што е нормално“, објаснува педијатарката.
Бебињата на оваа возраст може да почнат да чувствуваат сепарациска анксиозност, т.е. страв од разделување, што е нормално и привремено. Во оваа фаза, тие може да се плашат дека ќе го загубат примарниот родител или да плачат кога странци ќе ги погледнат или ќе се обидат да ги замат. Доенчињата кои го доживуваат овој тип на страв може да се разбудат ноќе, можеби плачејќи за својот родител.
Обрасците на спиење на доенчињата често се менуваат, па родителите не треба да се чувствуваат лошо ако тоа се случи и со нивното бебе. Ова може да биде само дел од здравиот развој, но може да биде поврзано и со други проблеми кои влијаат на спиењето, па затоа е важно да разговарате со вашиот педијатар.
