Оваа зима, освен на грип, ќе биде во знакот и на глобалната пандемија со новиот коронавирус, која се уште не покажува знаци на слабеење, па многу родители со право се загрижени за своите деца.
За тоа дали треба децата оваа година да се вакцинираат против грип, одговара познатиот и истакнат педијатар од Хрватска, Миливој Јованчевиќ, чие стручно мислење се поклопува со советите на многу други лекари од други земји.
Вакцината против грип намалува дел од опасностите, сметаат лекарите, бидејќи ако детето добие вирус во градинка или училиште, може да го пренесе на постарите членови на семејството на кои грипот може да им предизивка сериозна состојба. Можно е да имате коронавирус и грип во исто време и тоа никако не е добра ситуација, предупредуваат стручњаците.
Вакцината е безбедна за деца постари од шест месеци, а оптимално е да се вакцинира некаде кон крајот на октомври и почетокот на ноември, бидејќи оптималниот заштитен ефект настапува две недели подоцна и потоа полека попушта во следните три месеци.
Дополнителна причина за вакцинација против грип е моменталната пандемија со КОВИД-19. Имено, истовремената инфекција со вирусот на грип и коронавирус значајно ги зголемува шансите појава на тешки и по живот опасни форми на болеста.
Педијатарот Јованчевиќ се согласува дека оваа сезона, децата треба да се вакцинираат против грип.
“Примарно треба да се вакцинираат деца кои имаат некакви хронични болести (астма, шеќерна болест, срцеви или бубрежни болести), но заштитата со вакцина не е 100 процентна, затоа можноста за нивно заболување може да се намали ако се вакцинираат и здрави лица од околината (семејство, деца во групата во градинка или одделение)“, објаснува д-р Јованчевиќ.
Што се однесува на децата од поголемите одделенија во основните и средни училишта, вакцинацијата не е нужна, но е препорачлива, бидејќи освен што ќе бидат заштитени, се намалува и можноста за пренос на грипот на други лица.
Според него, во борбата против грип помага и здравата и разновидна исхрана, што повеќе движење на отворено, редовно проветрување на просториите, како и избегнување на премногу загреан и сув воздух во нив.
За да се намали опасноста од зараза со грип, д-р Јованчевиќ вели дека би било добро, ако е можно, да се избегнува опкружување во кое престојуваат поголем број луѓе, а особено деца од предучилишна возраст.
“Децата на предучилишна возраст немаат развиени хигиенски навики, така што течење на нос, кивање и кашлање, без покривање на устата со рака, ставање на раката во уста и допирање на се и секого околу себе, многу ефикасно шират различини причини за инфекција на дишните патишта, па така и за грип. Тоа е една од причините што во препораките за вакцинација на населението, децата од предучилишна возраст се наоѓаат во приоритена група. Втора причина е тоа што на таа возраст значајно се почести компликации“, предупредува педијатарот.
Според препораките на Светската здравствена организација, на прво место од препорачаните групи за вакцинација се наоѓаат деца на возраст до две години, потоа груоа на возраст помеѓу две и пет години, потоа лица (деца и возрасни) со хронични болести, вработени во здравство и образование, како и лица кои често патуваат.
И германскиот инфектолог Бернд Салзберг неодамна истакна дека заштитата на повозрасните лица, како баби и дедовци е една од причините поради кои вакцинација на децата е добра идеја, бидејќи комбинацијата на грип и КОВИД-19 може да се покаже фатална за лицата во трета животна доб, а американскиот Центар за контрола и превенција на болести (CDC) нагласува дека вакцинацијата против грип во сезоната 2020/2021 е најважна досега.
