Пред да станат родители, многумина велат дека ќе избегнуваат да им даваат на своите деца храна која не е хранлива и здрава. Но, реалноста е далеку од таа визија.
„Не се оптоварувајте поради тоа. Јас сум педијатар и сум се чувствувала понижено кога станав мајка на многу пребирливо дете. Моето 5-годишно дете ќе се заљубеше во секој чипс или десерт што ќе го пробаше. Овошјето и зеленчукот се друга приказна“, вели педијатарот Елизабет Дејвис за HuffPost.
Таа нагласува дека родителите не можат целосно да ја ограничат храната што ја консумираат децата.
“Ќерка ми дома пие само вода и млеко, но ако оди на роденден и испие две чаши сок, тоа е во ред. Ако одиме на вечера и сака лимонада или чоколадно млеко како уживање, и тоа е во ред”, додава таа.
Сепак, постојат одредени намирници кои педијатрите како д-р Дејвис избегнуваат да им ги даваат на своите деца или барем ограничуваат колку често ги даваат.
Тврди бонбони
„Количината на шеќер во тврдите бонбони е огромна и придонесува за расипување на забите и пукање на глеѓта. Тие се и опасност од гушење, па ако треба да забранам една работа, тоа би биле тврди бонбони“, вели д-р Кристина Џонс.
Ултра-обработена пакувана храна
„Не им ја давам оваа храна на моите деца бидејќи таа содржи премногу сол и лоши масти, а на располагање имаме и поздрава храна“, додава д-р Џонс.
Риба со висока содржина на жива
„Избегнувам риби со висока содржина на жива, како што се скуша, сабјарка, туна. Живата може да биде токсична за нервниот систем/мозокот доколку сме изложени на неа во големи количини, па затоа најдобро е целосно да ја избегнуваме кај малите деца и адолесцентите чиј мозок сè уште се развива“, истакнува д-р Дејвис.
Слатки сокови
„Никогаш не сум им послужила сок на моите деца. Соковите и безалкохолните пијалоци имаат многу концентриран шеќер, сахароза и често пченкарен сируп со висок процент на фруктоза. Тие исто така содржат премногу додаден шеќер и многу малку влакна“, забележува д-р Џенифер Трахтенберг.
Храна од која децата можат да се задушат
„Храната која претставува опасност за гушење за малите деца вклучува пуканки, виршли, грозје, чери домати, тврди бонбони, гуми за џвакање, моркови, парчиња варено месо итн. Оваа храна треба да се сече на многу мали парчиња или целосно да се избегнува додека децата не пораснат“, тврди д-р Дејвис.
Непастеризирано млеко
“Моите деца не јадат непастеризирани или сурови млечни производи или друга храна и пијалоци. Постои ризик од гастроинтестинални инфекции и тешка дијареа”, заклучува д-р Дејвис.
