Пелтечењето е состојба што може да се забележи уште од најрана возраст кај некои деца кои не зборуваат со иста леснотија како нивните врсници. Иако најчесто започнува во детството, пелтечењето може да се појави во било кој период од животот. За да го разбереме пелтечењето, прво треба да знаеме што претставува течен говор.
Течен говор е оној во кој говорните органи работат хармонично, создавајќи правилен ритам, нагласок и мелодија на зборовите и речениците. Пелтечењето, пак, е комплексен синдром кој ги опфаќа говорните, јазичните, психолошките, телесните и социјалните аспекти на личноста. Интензитетот на пелтечењето варира од благи форми до тешки состојби кои значително го отежнуваат секојдневното функционирање.
Пелтечењето често се појавува во периодот на брз говорен развој, односно помеѓу втората и третата година од животот. Во овој период, детето има голема желба да комуницира, но не е секогаш подготвено моторички да ги изговара зборовите и речениците. Затоа, може да се забележи дека детето запнува во говорот, повторува делови од зборовите, се колеба и уфрлува дополнителни звуци.
Логопедот е стручната личност која ќе процени дали овие симптоми се минлива фаза од нормалниот развој или почеток на пелтечење. Причините за пелтечење се различни и влијаат поинаку на секој поединец. Многу е важно да се земе предвид дали во семејството има лица кои пелтечат или дали детето доживеало некое стресно искуство.
Пелтечењето почесто се јавува кај момчињата, отколку кај девојчињата, и го зафаќа околу 3-5% од децата. Ова е сложен проблем кој бара посветеност и трпение од страна на детето и неговата околина, како и стручна поддршка.
