Ненаспиеноста е еден од главните проблеми на родителите, која води до исцрпеност, а може да потрае и со години. Постои ли решение? Може ли бебето да научи само да заспива и да ја преспие ноќта?
Еве што порачуваат стручњаците:
“Бебето можеме да го научиме да спие, но првите три месеци не, оти во тој период ние мора да го слушаме бебето, мајката треба да дои на барање и тогаш нема можност за било какво тренирање на спиење. По тие месеци, им советувам на родителите преку ден што повеќе да се со бебето, за да тоа во текот на ноќта нема преголема потреба за физичка активност“, вели д-р Харви Карп, светски познат педијатар и стручњак за детски развој.
Тој нагласува дека секое дете е индивидуа и треба да му се прилагодиме и да го следиме неговиот ритам, без да го споредуваме со други деца.
Услови од матката
Д-р Карп развил пет чекори кои имитираат услови од матката и кои го олеснуваат заспивањето на бебето и продолжување на неговото спиење: повивање, лулање, позиција страна-стомак, бел звук и доење.
“Бебето девет месеци било во стомакот и нашиот надворешен свет му е необичен, престуден, претивок и премногу светол. Во мајчиниот стомак слушало исклучиво гласни звуци 24 часа на ден, било во топло и било стиснато и постојано се лулало. Тие пет чекори се многу важни, оти со нив на бебето му нудите услови кои ги имало во матката, и со нив може да го продолжите сонот на бебето од еден на три часа“, објаснува д-р Карп.
Според него, на бебињата им пречи што не можат да го стават палецот во уста и што не се лулаат, туку ги ставаме на рамна површина, на грб и тоа предизвикува плачење. Важно е да се нагласи дека бебето никогаш не треба да го ставате да спие на стомак, бебето задолжително мора да спие на грб.
