Постојат специфични причини зошто доените бебиња често испуштаат гасови кои можат да бидат многу гласни и со непријатен мирис. За среќа, не треба да се грижите за повеќето од нив.
„Секое бебе испушта гасови. Всушност, луѓето, вклучувајќи ги и бебињата, произведуваат гасови во просек од 14 до 23 пати на ден“, вели педијатарот Флоренсија Сегура.
Ова важи за сите бебиња, без разлика на начинот на хранење.
“Не постои разлика во производството на гасови кај доените бебиња и оние кои се на адаптирано млеко. Бебињата во двете групи можат да произведуваат многу или малку гасови“, истакнува педијатрката.
Сепак, мајките бараат одговор на прашањето зошто нивните доени бебиња испуштаат гасови. Тие се загрижени дали причината е некоја состојка во мајчиното млеко или положбата во која го хранат детето. Се покажало дека во прашање може да биде и едното и другото. Педијатрите велат дека постојат пет можни причини за зачестени гасови кај доените бебиња.
1. Реакција на исхраната на мајката
Некои намирници поттикнуваат производството на гасови.
„Понекогаш храната што ја јадат мајките може да предизвика гасови кај нивните бебиња. Тоа се претежно зачинета храна, брокула, компири, грав и карфиол“, вели д-р Сегура. Зеленчукот како кељот и прокељот може да го имаат истиот ефект.
2. Нетолеранција на кравјо млеко
Не секое бебе може да толерира кравјо млеко. д-р. Сегура вели дека овој проблем кај бебињата предизвикува гасови, како и слузава и воденеста столица.
„Кога мајката ќе ги исфрли млечните производи од исхраната, овој проблем треба да исчезне“, посочува докторката.
Ако се сомневате на нетолеранција на храна или чувствителност на исхраната на мајката, секогаш треба да се консултирате со педијатар пред да исфрлите одредени групи на намирници од вашето мени.
3. Зачестени подои
Не постои идеален број на подои во денот. Но, „честото и кратко хранење може да доведе до чести гасови“, вели д-р Крупа Плејфорт. Нејзиниот совет е да направите распоред за доење со набљудување и препознавање на знаците на глад, односно барем на секои два до три часа во првите месеци од животот.
4. Лош фат
Ако бебето има лош фат, во текото на подојот може да проголта многу воздух, што ќе поттикне производството на гасови.
5. Положба при хранење
Несоодветните техники на хранење или полоѓби на хранење може да го предизвикаат овој проблем. Позицијата на фудбалската топка се смета за идеална ако бебето има чести гасови, а се предизвикани од неправилна положба при хранење.
„Доенчињата сè уште немаат развиена дигестија и често произведуваат многу гасови. Можете да им олесните со масажа на стомакот, движење на нозете на детето како возење велосипед и нежно притискање на стомакот, што ќе го стимулира ослободувањето на гасови“, објаснуваат педијатрите.
