Несаканите ефекти кои се појавуваат во период од два или три дена по вакцинирањето против КОВИД-19, се чести и очекувани. Повеќето од нив се благи и од локален карактер и не бараат понатамошна медицинска помош.
Веројатноста за појава на нарушување на згрутчување на крвта како можен несакан ефект од вакцинирањето е исклучително мала, но лицата треба да бидат свесни за можните симптоми за да ги препознаат и за да побараат итна медицинска нега, која ќе им овозможи навремено лекување и намалување на ризикот за развој на компликации.
Крвните згрутчувања проследени со ниско ниво на тромбоцити (крвни плочки), може да се појават од четири до 20 дена по примањето вакцина. Вакцинираните лица треба, без одложување, да побараат итна лекарска помош ако ги забележат следниве симптоми:
- Краток здив (отежнато дишење)
- Болка во градите
- Отоци на нозете
- Долготрајна болка во стомакот
- Невролошки симптоми (од типот на тешки и долготрајни главоболки и заматен вид)
- Ситни модринки на кожата, оддалечени од местото на примање на вакцината
Податоците за честотата и за ризик факторите за појава на овие многу ретки видови на несакани ефекти, се уште се оскудни.
