Време е на настинки и вируси, а децата, особено кои се во колектив, градинка, училишта, честопати ги преболуваат и до десет пати годишно. Во повеќето случаи, станува збор само за полесни болести, но тешко е да се гледа кога детето се мачи со симптоми кои му го попречуваат хранењето и спиењето. Но, постојат начини да се олеснат симптомите до закрепнувањето со помош на некои домашни препарати, кои не можат да нанесат штета.
Еве неколку совети како да ја ублажите кашлицата, а кои не се штетни за употреба и се дел од домашната аптека.
- Лажица мед
Неколку студии покажале дека една кафена лажичка (15 мл) мед, околу половина час пред спиење, може да помогне да се смири кашлицата. Антимикробните и антибактериските својства на медот можат поволно да делуваат на детскиот организам, но имајте на ум дека децата под една година не треба да консумираат мед поради опасноста од доенечки ботулизам.
- Многу течности
Хидратацијата на детскиот организам е важна за малите пациенти да се чувствуваат подобро. Настинката или кашлицата може да го исцрпат малото тело, а недостатокот на течности може само да ја влоши состојбата. Често му нудите мали количини храна на болно дете, а особено е важен внесот на течности. Опциите погодни за децата вклучуваат супа, природен сок или сок од јаболко, исто така цеден, природен, измешан со малку вода, а се препорачува и чај од шипка, по можност незасладен.
- Спреј за нос
Морската вода во спреј помага да се ослободи слузта и да се исчисти носот. Потоа користете детски средства за чистење на носот или, кај постарите деца, рог за плакнење на носот со физиолошки раствор.
- Купки за намалување на температурата
Доколку вашето дете има температура повисока од 38,5 степени, измерена под пазувите, се препорачува туширање со млака вода или ставање ладни облоги од вода на пределот на градите и стомакот.
- Спиење во повисока положба
Кога детето си легнува, ако е постаро од една година, подигнете ја неговата глава за слузта да не се слева во дишните патишта и на тој начин да предизвика напади на кашлање во текот на ноќта.
