Започнување на доењето во првиот час по раѓањето, ексклузивно доење во првите шест месеци и продолжување на доењето две или повеќе години заедно со безбедна и соодветна дополнителна исхрана, се препораките на Светската здравствена организација и УНИЦЕФ во поглед на доењето.
Ексклузивно доење во првите шест месеци од животот препорачува и Американскиот центар за контрола и превенција на болести, а тоа значи во овој период да не се дава друга храна или течности, вклучително и вода. Истата препорака доаѓа и од Американската академија за педијатрија која повикува на ексклузивно доење на бебињата во првите шест месеци од животот, истовремено охрабрувајќи ги социјалните и системските промени за поддршка на мајките кои избираат да дојат.
Мајчиното млеко е „златен стандард“ за исхрана на доенчињата, единствен извор на исхрана кој ги задоволува нутритивните и физиолошките потреби на новороденчето. Kога всушност треба да започне доењето и кој е клучот за успешно доење? Зошто мајчиното млеко е идеална храна за бебињата? Дали колострумот е најмоќниот природен имунолошки бустер познат на науката? Низ колку фази минува мајчиното млеко, прилагодувајќи се на нутритивните потреби на бебето? – на овие и други прашања на тема мајчино млеко и имунолошки аспекти на доењето, во новото издание на подкастот „Ваш педијатар“ разговараме со проф. д-р Катарина Ставриќ, специјалист педијатар-имунолог и професор на Медицинскиот факултет во Скопје.
