Поголем е ризикот од згрутчување на крвта во мозокот од инфекција со коронавирус отколку од вакцина против Ковид-19, објавија вчера британските научници, откако извештаите за згрутчување на крвта ги загрозија кампањите за вакцинација во голем број земји.
Важноста на ова откритие е дека не враќа на фактот дека ова е навистина страшна болест, со цела низа на појави, вклучувајќи и зголемен ризик од CVST, рече Џон Гедес, директор на Центарот за истражување NIHR
Извештаите за многу ретка церебрална венска синусна тромбоза (CVST) се поврзани со примањето на вакцините АстраЗенека и Џонсон и Џонсон. Затоа, САД оваа недела привремено ја прекинаа употребата на вакцината Џонсон и Џонсон додека не се испита врската со згрутчувањето на крвта, додека Данска целосно престана да вакцинира со АстраЗенека.
Британските и европските регулатори посочија дека придобивките од вакцините ги надминуваат ризиците. Истражувањето спроведено на 500.000 пациенти со Ковид-19, открило дека CVST се појавила кај 39 луѓе на милион заразени, велат истражувачите. Резултатите ги споредиле со податоците на Европската агенција за лекови (ЕМА), според кои пет лица на милион луѓе пријавиле CVST откако примиле вакцина на АстраЗенека.
Извештаите за многу ретка церебрална венска синусна тромбоза (CVST) се поврзани со примањето на вакцините АстраЗенека и Џонсон и Џонсон
Научниците велат дека ризикот од CVST е осум до 10 пати поголем по инфекција со коронавирус отколку при вакцинирање со постојните вакцини против Ковид-19.
„Изгледа дека ризикот од појава на CVST по Ковид-19 е битно поголем отколку што е по примање на вакцината Оксфорд-АстраЗенека“, изјави пред новинарите Максим Такет од Оксфорд.
Такет рече дека стапката на смртност од CVST изнесувала околу 20 проценти без разлика дали се случила по инфекција со коронавирус или примена вакцина, што укажува на тоа дека тромбите се главен ризик фактор.
Истражувачите истакнаа дека Ковид-19 е повеќе поврзан со мозочните удари отколку CVST и дека актуелната дебата за вакцините ја занемарила можноста за појава на потешка форма на болеста.
„Важноста на ова откритие е дека не враќа на фактот дека ова е навистина страшна болест, со цела низа на појави, вклучувајќи и зголемен ризик од CVST“, рече Џон Гедес, директор на Центарот за истражување NIHR.
Истражувачкиот тим од Оксфорд изјавил дека тие работеле независно од другиот тим од Оксфорд кој ја разви вакцината АстраЗенека, пренесува „Хина“.
