Не постои универзален одговор на прашањето која е идеалната разлика во години помеѓу децата, бидејќи таа за секое семејство е поинаква, а понекогап на таа одлука не можеме премногу да влијаеме. Родителите различно пристапуваат на таа тема, а нивната возраст е еден од најважните фактори при изборот. Иако се повеќе родители се одлучуваат на мала разлика помеѓу децата, ви донесуваме некои причини зошто поголема разлика меѓу децата е добра одлука.
- Постаро дете подобро ќе ја разбере ситуацијата
Кога првото дете ќе биде малку постаро и позрело, подобро ќе го разбере целиот концепт на грижа за бебето. Помали се шансите постаро дете да се чувствува изоставено кога ќе пристигне нов член и поверојатно е дека ќе ги почитува потребите на бебето.
- И помалото дете ќе добие еднакво внимание од родителите
Времето поминато во гушкање и галење на кревет, прошетки во природа, игри на подот, се се прекрасни моменти кога родителите се поврзуваат со своите деца. Колку е поголема разликата меѓу децата, толку повеќе можности ќе имате да му посветите исто квалитетно време и внимание и на помладото дете. Постарото дете дел од денот ќе го поминува во училиште, на слободни активности или со пријателите, а вие ќе имате време само за помалото дете што често не е можно кога разликата во годините е мала.
- Постарото дете станува посамостојно
Постаро дете оди самостојно во тоалет, може да подготви ужина и може само да игра. Сето тоа се ситуации кои го олеснуваат соживотот со повеќе деца. Можете да се потпрете на постаро дете и кога ви треба помош со помалото дете, важно е само да не ја користите таа поддршка и да запомнете дека вашето постаро дете не е родител на помалото дете.
- Ќе бидете поодморени
За разлика од родителите чии деца се слични по возраст, ќе имате време да спиете пред да пристигне новото бебе. Сонот на вашето постаро дете ќе се подобрува, а вие ќе имате повеќе можности за одмор и за време на бременоста.
- Помалку кавги меѓу децата
Децата на слична возраст повеќе се караат, а колку е поголема разликата меѓу нив, толку е помала веројатноста да се натпреваруваат. Постарото дете ќе се чувствува како мал учител на помалото дете и тоа ќе му импонира. Со разликата во години доаѓаат и различни интереси, па ќе си играат со различни играчки и нема да има толку драма кој од кого што земал.
