Новите мајки вообичаено мислат дека породувањето е крај на нивната “втора“ состојба. Вистината е малку поинаква: во првите денови по породувањето и првите неколку недели од животот на бебето ќе се соочите со низа непријатности и чудни чувства. Постнаталниот период често ќе ве натера да се запрашате: “дали ова е нормално“. Еве го одговорот.
ШТО Е НОРМАЛНО ДА ЧУВСТВУВАТЕ ПО ПОРОДУВАЊЕТО?
- Болка поради епизиотомијата
Ако на породување ви е правена епизиотомија, односно ако сте “сечени“ во текот на породувањето, болката е појава што не треба да ве изненади. Епизиотомија се прави во случаи кога се заканува опасност во текот на породувањето да пукне перинеумот (дел помеѓу вагината и аналниот отвор). Тоа е рез која бара неколку конци, а ова е доволно да ви сигнализира дека такво нешто сепак треба да боли.
Во текот на неколку наредни дена, седењето ќе ви биде непријатно, а и одењето во тоалет може да биде мачно. Но, одењето би можело да помогне да го забрзате физиолошкиот процес на закрепнување.
- Контракции и по породувањето
Ако сте помислиле дека со породувањето ќе престанат контракциите, сте згрешиле. Неколку недели по породувањето, а особено во првите 4 до 6 дена, матката се контрахира за да се собере и да се врати во нормална големина. Чувството е како да имате контракции или менструални болки, но не плашете се, тие се многу поблаги во споредба со оние за време на породувањето.
- Непријатен мирис
За жал, ретко кој за ова сака да зборува, па многу мајки се изненадени. Крварењето по породувањето има силен и непријатен мирис и е едно од негативните страни на постнаталниот период. Сепак, ако интензивниот мирис стане вознемирувачки непријатен, ако е проследен со болки или чудна боја на исцедокот, јавете се на лекар да ја елиминирате можноста за инфекција.
- Температура поради доењето
Надоаѓањето на млекото и почетокот на доењето кај многу жени се проследени со покачување на температурата. Оваа состојба е минлива, а температурата обично паѓа по еден ден. За време на доењето, градите се исклучително чувствителни, тешки и напнати, особено пред подој. Подоите на почетокот може да биде дури и непријатни, а така можете да го доживеете и чувството на “доаѓање млеко“.
Нема потреба за загриженост, се додека доењето не е проследено со остри болки во брадавиците и телесна температура над 38 степени. Во овој случај, направете стручна консултација, бидејќи ви се заканува воспаление ан дојките, што е многу болна состојба и може да се искомплицира.
- Исклучителен замор
Штотуку донесовте на свет ново живо суштество, организмот ви е исцрпен, а се навикнувате и на ноќни подои, будење, сосема нов тип на обврски. Верувајте, ќе бидете уморни некое време. Затоа, не се обвинувајте себеси што ќе застанете на средина на реченица оти го немате вистинскиот збор, заборавате каде нешто сте оставиле или едноставно – само ќе заспиете на сред разговор.
- Тага и загриженост по породувањето
Доколку се чувствувате тажно и загрижено, знајте дека тоа е поради хормоните кои “се враќаат во нормала“, што во основа значи нов шок за вашиот организам. Ако забележите дека не сте во можност да ги спречите овие чувства, ако дури и вашето бебе не ве прави среќна, обратете се некому – постпородилната депресија воопшто не е ретка појава и се јавува околу две до три недели по породувањето.
