Самодовербата е особина која на детето му дава одредена доза храброст да го истражува светот околу него, да ги прифати предизвиците пред него и во исто време да верува во себе, како и во сопствените способности. Иако секој родител се труди да развие здрава доза на самодоверба кај своето дете уште од најмала возраст, тоа воопшто не е лесна задача.
Имено, родителите често несвесно прават одредени грешки кои го саботираат развојот на самодовербата на детето, а со тоа им ги намалуваат шансите да бидат успешни подоцна во зрелата возраст.
Иако има многу грешки, една, како што објаснуваат психолозите, сепак е најчеста и најголем број родители по грешка ја повторуваат. Се работи за тоа да не му се дозволи на детето повремено да искуси ризик.
Психолозите тврдат дека повеќето родители имаат лоша навика да го предупредуваат своето дете за потенцијална опасност на секој чекор. Иако е сосема разбирливо родителот да се плаши за безбедноста на своето дете, „држењето под стаклено ѕвоно“ всушност има спротивен ефект. Исто така, бројни студии покажале дека децата, доколку родителите целосно го отстранат ризикот од нивните животи, подоцна ќе пораснат во луѓе со ниска самодоверба.
