Д-р Брајан Кокс донел на свет повеќе од 5.000 бебиња во последните 33 години – но едно од нив е специјално.
Кортез вели дека докторот е навистина посебен. „Кога се роди Логан, му пееше „Среќен роденден“, исто како што ми пеел и на мене кога сум се родила. Тоа е нешто како негов потпис“
На 23 март 1995 година, Кокс ја породил мајката на Лорен Кортез во Методистичката болница во Сан Антонио, Тексас. Сега, 25 години подоцна и многу бебиња родени во меѓувреме, д-р Кокс го донел на свет и бебето на Кортез – Логан Џејмс, роден на 26 јули.
„Една од причините што ја одбрав оваа работа е затоа што има многу малку полиња во медицината коишто носат волку многу среќа“, изјави д-р Кокс за „Си-ен-ен.“ „Она што го прави ова со Лорен толку прекрасно е колку многу ја обожавам неа и нејзината мајка. Ја гледав кога беше бебе. Ја видов кога имаше 2 години, а потоа ја гледав за време на целата нејзина бременост. Беше многу посебно“.
Д-р Кокс бил тазе излезен од медицинското училиште кога ја запознал мајката на Кортез, Изабел Луна. На денот на породувањето, Луна и Кокс се сликале со бебето Кортез. Децении подоцна, новата мајка направи скоро идентични фотографии со докторот, освен што овој пат е со сопственото бебе.
Кортез потоа ги сподели фотографиите на Твитер во објава која собра повеќе од 700.000 лајкови.
„Поради пандемијата, мајка ми не можеше да биде во болница со мене, но постојано ме потсетуваше дека треба да ги направам тие фотографии со д-р Кокс“, изјави Кортез. „Таа знаеше веднаш дека тој ќе сака да ги повтори сликите. Тоа беше многу посебен момент и не можам да дочекам да ја споделам приказната со Логан еден ден“.
Кортез вели дека овој доктор е навистина посебен. „Со него не станува збор само за бебето. Тој се грижи за нас како луѓе и за нашите животи. Кога се роди Логан, му пееше „Среќен роденден“, исто како што ми пеел и на мене кога сум се родила. Тоа е нешто како негов потпис“. (Си-ен-ен)
