За правилен развој на вашето дете, од голема важност се љубовта и нежноста што му ги давате. Љубопитните малечки внимателно го набљудуваат секое ваше движење и го впиваат секој изговорен збор како „сунѓер”. А најмногу помнат низ игра. Затоа, не е чудно што експертите ги поттикнуваат родителите да си играат со своето бебе, бидејќи со тоа истовремено го поттикнуваат и нивниот развој Авторката Ен Пулкинен во својата книга „Развој на децата преку игра“ опишува над 100 корисни начини на кои можете да го научите вашето бебе да зборува преку забава и смеа, а во продолжение ви претставуваме неколку од нив.
Очи, нос, уши, уста…
Постојано кажувајте му на детето имињата на одделни делови од неговото тело. Прашајте го: „Каде е носот? Каде се ушите?”. Обрнете внимание на именувањето на секој дел од телото, па и гениталиите. Многу деца не го знаат соодветниот збор за овие делови од телото. Сигурно сте ја слушнале реченицата: „Сега ќе те мијам таму долу!“.
Да и не
Покажете му на детето фотографија со, на пример, топка. Прашајте го: „Дали е ова автомобил?“. Отпрвин детето ќе ви одмавне со главата, а потоа ќе одговори со зборови: „Не“. Наизменичното потврдно кимнување и зборот „да“, односно кимнување и зборот „не“ ги прават децата среќни, а разбирањето на говорот станува се подобро.
Донеси, те молам…
Дајте му на детето едноставни задачи: „Те молам донеси ја топката!“, „Однеси ја чинијата во кујна!“. Детето со гордост ќе ги изврши задачите.
Гласно, тивко
Играјте со јачината на вашиот глас – еднаш малку погласно, а потоа малку потивко. На детето ќе му се допадне и наскоро ќе почне да ве имитира.
Врска на далечина
Можете да разговарате со вашето дете дури и на поголема оддалеченост, разговарајте со него од бањата додека си игра во дневната соба. Вашиот глас ќе звучи малку поинаку, а детето ќе го слуша со посебно внимание.
Радост со книги
Прелистувањето низ сликовниците заедно и именување на предмети и суштества од илустрациите го проширува речникот на детето. Првите сликовници треба да имаат по една, јасно препознатлива илустрација на сликата, на пример топка или мачка.
