Растењето е процес во кој детето учи за светот – но што е поважно, учи за себе преку очите на своите родители. Ако тие очи се нежни, трпеливи и искрени, детето создава внатрешно чувство на сигурност и доверба. Но, ако се полни со неискажани пораки, огорчени тишини и емоционални манипулации, детето станува возрасен кој постојано ја доведува во прашање сопствената вредност.
Психологот Александра Ракиќ на социјалните мрежи неодамна сподели објава што предизвика големо внимание. Преку едноставен список на однесувања, таа објасни како да препознаете дали сте пораснале со пасивно-агресивен родител – и како една, навидум безопасна фраза како „Прави што сакаш“ може да остави трајни рани.
Бидејќи кога детето ги слуша тие зборови, тоа не слуша слобода на избор. Слуша: „Не ми е гајле“, „Ако направиш грешка, твоја е вината“, „Нема да ти помогнам“ – и учи дека емоциите не се безбедни, дека искреноста може да биде опасна и дека љубовта често доаѓа со скриена цена.
Еве некои од знаците дека сте пораснале со пасивно-агресивен родител:
- Ви велеле дека не се вознемирени дури и кога сте знаеле дека се, бидејќи тоа јасно го покажувале со однесувањето.
- Кога биле лути, ви давале „молчелив третман“ наместо да зборуваат за проблемот.
- Се однесувале ладно – или така сè уште се однесуваат – кога со нив споделувате нешто што ви е важно.
- Намерно споменувале непријатни настани или ваши стари грешки пред други.
- Ви поставувале незгодни и напнати прашања за да се чувствувате непријатно.
- Глумеле жртва, за да се чувствувате виновни или одговорни за нивните емоции.
- Ве „фалеле“ така да истовремено ги нагласувале вашите слабости и несовршености.
Психологот истакнува дека ваквото однесување не е безопасно. Растењето со пасивно-агресивни родители може да има сериозни последици:
- Хронична несигурност во себе
- Тешкотии во воспоставувањето доверба во односите
- И најважното – пренесување на истиот модел на сопствените деца
Ако се препознавате себеси во овие редови, знајте дека не сте сами – и дека препознавањето на проблем не е слабост, туку прв чекор кон ослободување.
