Процесот на вакцинација против COVID-19 е во тек низ целиот свет, а од утре официјално започнува и во нашата земја. Досега не е забележано дека кај некои вакцинирани лица се јавиле сериозни несакани ефекти, а следниве три несакани ефекти всушност би можеле да бидат добар знак.
Имено, Аманда Кон, член на Националниот центар за имунизација и респираторни заболувања на CDC, истакнува дека постојат три специфични несакани ефекти што можат да се појават по вакцинацијата, а кои всушност значат дека вакцината делува.
Болка на местото на инјектирање
Кон наведува дека луѓето треба да бидат свесни дека можат да почувствуваат болка на местото на инјектирање по вакцинацијата. Но, ова е сосема нормална реакција и обично трае околу 24 часа. Американскиот центар за контрола и превенција на болести (CDC) советува да ставите влажна облога на местото на убодот за да ја ублажите болката.
Замор
Кон истакнува дека заморот е уште еден показател дека вашиот имунолошки систем си ја работи својата работа по вакцинирањето. Некои луѓе не се уморни по првата доза, но може да се чувствуваат исцрпено по примање на втората доза на вакцината.
Температура
Последниот несакан ефект кој го потенцира Кон е благо покачена температура, која во овој случај е обично малку пониска од 38° C. Кон наведува дека сите овие несакани ефекти би требало да се повлечат за два дена, пренесува „Best Life“.
