Кинеските лекари забележале дека кај новите случаи од североистокот на земјата, инфекцијата со коронавирус се манифестира поинаку отколку кај изворните случаи во Вухан, што укажува дека овој патоген може да еволуира на начини кои се непознати за нас.
Во последните две недели се забележани 46 нови случаи на зараза во три града (Шулан, Џилин и Шенгјанг)
Според најновите анализи, пациентите од северните провинции Џилин и Хајлонгџианг го имаат вирусот во своето тело подолго и им треба подолго време откако ќе оздрават да добијат негативен резултат на тестот за Ковид-19, изјави Киу Хаибо, еден од главните кинески доктори, за државната телевизија.
Лекарите исто така забележале дека на заразените лица од североистокот на земјата им треба повеќе време од една или две недели, како што беше во Вухан, за да развијат симптоми, пишува „Блумберг“.
„Подолгите периоди во кои инфицираните пациенти не покажуваат никакви симптоми ги предизвикаа кластерите на семејни инфекции“, рече Киу.
Научниците сè уште не се сигурни дали станува збор за значајна мутација на вирусот или едноставно кинеските лекари сега имаат и време и ресурси за да ги набљудуваат пациентите потемелно. Имено, кога започна епидемијата во Вухан, локалниот здравствен систем беше толку преоптоварен што се следеа само најсериозните случаи.
„Теоретски, некои промени во генетската структура може да доведат до промени во структурата на вирусот или однесувањето на вирусот. Меѓутоа, повеќето мутации воопшто не доведуваат до значајни промени“, изјави епидемиологот Кеиџи Фукуда од Универзитетот во Хонг Конг.
„Поверојатно е дека овие случаи во Кина не се поврзани со мутацијата. Потребни се многу јасни докази пред да се заклучи дека вирусот мутира“, додаде тој.
Различно оштетување на органите
Д-р Киу рече дека набљудувањето на пациентите од североисточното жариште покажало дека тие најчесто имаат оштетување на белите дробови, додека пациентите во Вухан претрпеле оштетување на повеќе органи – срце, бели дробови, бубрези и црева.
Експертите веруваат дека новата жариште на североистокот на Кина се појавило по контакт со заразени патници од Русија. Генетското секвенционирање покажало совпаѓање помеѓу случаи на североистокот на земјата и оние во Русија.
Провинциите во североисточна Кина наредија враќање на рестриктивните мерки, а железничкиот сообраќај и работата на школите се прекинати.
