ПИШУВА:
ПРИМ. Д-Р СОЊА ПЕТРОВСКА
педијатар-пулмоалерголог
♦♦♦♦♦♦♦
Родителот треба да го однесе своето дете кај лекар ако се сомнева дека има астма. Раниот третман ќе помогне во контрола на симптомите и евентуално спречување на напади на астма
Кај детската астма, белите дробови и дишните патишта лесно се воспалуваат кога се изложени на одредени агенси, како што се вдишување на полен или добивање настинка или друга респираторна инфекција. Детската астма може да предизвика изразени дневни симптоми кои им сметаат на децата при играње, спортување, на училиште и при спиење. Кај некои деца, неконтролираната астма може да предизвика тешки напади на астма. Детската астма не е различна болест од астма кај возрасни, но децата се соочуваат со посебни предизвици. Астмата е водечка причина за посета на одделенијата за итна медицинска помош, за хоспитализации и отсуство од училиште. За жал, детската астма не може трајно да се излечи и симптомите можат да продолжат во адултната возраст. Со правилен третман, родителот може да ги намали тегобите кај детето, симптомите да бидат под контрола и со тоа да се спречи оштетувањето на белите дробови кои се во развој.
Симптоми
Вообичаени знаци и симптоми кај детската астма се:
- Честа кашлица, која се влошува кога детето има вирусна инфекција, се појавува додека детето спие или е предизвикана со напор или ладен воздух;
- Свиркање во градите или отежнато дишење кога детето е надвор;
- Скратен здив;
- Болка или стегање во градите.
Детската астма исто така може да предизвика:
- Проблем со спиењето поради недостаток на здив, кашлица или отежнато дишење;
- Епизоди на кашлица или отежнато дишење што се влошуваат при настинка или грип;
- Продолжено оздравување при бронхитис после респираторна инфекција;
- Проблеми со дишењето што го спречува играњето или спортувањето;
- Замор, што може да биде резултат на неквалитетен сон.
Знаците и симптомите на астма варираат од дете до дете и со текот на времето може да се влошат или подобрат. Детето може да има само една индикација, како што е надразнителна кашлица или стегање во градите. Може да биде тешко да се каже дали симптомите се предизвикани од астма или некоја друга состојба. Периодично или долготрајно отежнато дишење и други симптоми слични на астма, може да бидат предизвикани од бронхитис во склоп на инфекција или друг респираторен проблем.
Кога да се посети лекар?
Родителот треба да го однесе своето дете кај лекар ако се сомнева дека има астма. Раниот третман ќе помогне во контрола на симптомите и евентуално спречување на напади на астма. Ова се однесува особено ако родителот забележи некој од овие знаци:
- Кашлицата е постојана, во напади или се чини дека е поврзана со физичка активност;
- Стенкање при дишење или свиркање при издишување;
- Скратен здив или забрзано дишење;
- Детето се жали на притисок во градите;
- Повторливи епизоди на бронхитис или пневмонија.
Знаците и симптомите на астма варираат од дете до дете и со текот на времето може да се влошат или подобрат. Детето може да има само една индикација, како што е надразнителна кашлица или стегање во градите. Може да биде тешко да се каже дали симптомите се предизвикани од астма или некоја друга состојба
Децата кои имаат астма, често може да кажат работи како што се: „Чувствувам нешто чудно во моите гради“ или „Јас секогаш кашлам“. Дали детето кашла во сон. Плачењето, смеењето, викањето или силните емоционални реакции и стресот може да предизвикаат кашлање или отежнато дишење. Ако на детето му е дијагностицирана астма, создавање план за астма може да му помогне на родителот и на другите старатели да ги следат симптомите и да знаат што да прават ако се појави напад на астма.
Кога детето треба итно да се однесе на лекар
Во тешки случаи, може да се види вовлекување на меѓуребарните простори и југулумот на градите и детето се бори за воздух. Детето може да има забрзано чукање на срцето, потење и болка во градите.
Детето веднаш треба да се однесе во болница ако:
• Не може да зборува кога дише • Ги користи стомачните мускули за дишење • Ги проширува ноздрите кога дише • Се обидува толку напорно да дише што стомакот силно се вовлекува при дишење.
Иако епизодите на астма варираат во сериозноста, нападите на астма можат да започнат со кашлица, после што се појавува визинг и отежнато дишење.
Причини
Причините за детска астма не се целосно познати. Некои фактори за кои се смета дека се вклучени се:
- Наследна склоност за развој на алергии;
- Родители со астма;
- Некои видови на инфекции на дишните патишта во многу рана возраст;
- Изложеност на фактори на животната средина, како што се чад од цигари или друго загадување на воздухот.
Зголемената чувствителност на имунолошкиот систем предизвикува белите дробови и дишните патишта да реагираат со едем и зголемено создавање на секрет, кога се изложени на одредени дразби. Реакцијата на активирањето може да се одложи, што го отежнува идентификувањето на причинителот.
Предизвикувачите варираат од дете до дете и може да вклучуваат:
- Вирусни инфекции како што е обичната настинка;
- Изложеност на загадувачи на воздухот, како чад од тутун;
- Алергии на грини од прашина, влакна од домашни миленичиња, полен или мувла;
- Физичка активност;
- Временски промени или студен воздух;
Понекогаш, симптомите на астма се појавуваат без очигледни предизвикувачи.
