Проф. д-р Бранимир Несторовиќ, педијатар пулмолог-алерголог од Универзитетската детска клиника „Тиршова“ во Белград, има своја емисија на LinkTV, насловена „Здраво со професорот Несторовиќ“. Во една од епизодите, тој зборува за покачената телесна температура кај децата, за тоа како е најдобро да се измери, кога е време за давање лек и други, за родителите, битни работи, пренесува „Зелена учионица“.
„Телесната температура е наш одбранбен механизам и тоа е индивидуална карактеристика. Секој има своја идеална телесна температура. Кога некоја мајка ќе дојде и ќе ми каже: „Моето дете има температура“, ја прашувам колкава му е температурата. Ако одговори 37,4 и велам дека тоа не е температура и таа е речиси навредена. Учебниците велат дека нормалната температура кај човекот се движи од 35,5 до 37,8 степени. Гледате дека може да варира дури за два степени. Има луѓе кои постојано имаат ниска температура.
Генерално, колку што е покрупен човек ќе има пониска, односно колку е поситен – толку е поголема неговата телесна температура. Тоа е како кај животните, кокошките имаат 42, а слоновите 35.
Како правилно се мери телесната температура кај детето?
Најсигурно е да се измери температурата ректално, но јас никогаш не би го сторил тоа. Детето може да се повреди. Мерењето под пазуви е комплетно несигурно. Треба точно да ја пронајдете и погодите артеријата под пазувата и тука да го држите термометарот 10 минути. А она што е најнезгодно е тоа што кога ќе му дадете лек на детето и температурата ќе се спушти, под пазувите топлината може да се задржи уште 8 до 10 часа. Мерењето на чело е исто така несигурно, како и во увото.
Како тогаш да се измери температурата? Па, убаво, ставете ја раката на челото и видете дали е жешко. Што ви е гајле што ќе каже термометарот? Вас треба да ве интересира како се однесува детето. Ако температурата е покачена и детето си игра, зошто би му давале лек?
Она што секако треба да го направите кога вашето дете е малаксано и има висока температура е да му го измерите пулсот. Доколку пулсот е непропорционално висок во однос на температурата (за секој степен на температура тој се зголемува 10 удари во минута и тоа е нормално), тогаш тоа е знак дека нешто се случува, дека детето има некоја инфекција што треба да се лекува.
Внимателно со антипиретиците
Најинтересно е тоа некое смешно верување дека температурата постојано ќе се зголемува ако не ја симнувате. Ако температурата треба да оди до 39,6, таа ќе оди, нема да ја надмине. Се разбира, она што прво го прават родителите – му даваат на детето лек за температура. Но, овие антипиретици се лекови што се користат за лекување на ревматизам и тие го намалуваат имунитетот. Затоа, треба да се биде многу внимателен со нив.
Значи, ако детето изгледа лошо, ако е омалаксано, има болки, тогаш е во ред, дајте му лек. Но, не во првиот момент кога ќе ви се причини дека температурата малку скокнала.
Симнување на температурата со загревање (препотување) – на многумина, како деца, така им ја симнувале температурата. Сепак, овој метод е добар за возрасни, но не е за деца затоа што можат да добијат фрас. Препотувањето е одлично затоа што вие „опасно“ ја кревате температурата, и потоа таа почнува да паѓа.
Она што секако треба да го направите кога вашето дете е малаксано и има висока температура е да му го измерите пулсот. Доколку пулсот е непропорционално висок во однос на температурата (за секој степен на температура тој се зголемува 10 удари во минута и тоа е нормално), тогаш тоа е знак дека нешто се случува, дека детето има некоја инфекција што треба да се лекува
Нашиот организам работи совршено, тој знае сè што треба да направи, вие треба само да го насочите. Значи, загревање како начин за симнување на температурата НЕ за деца под 6 години.
Не треба да се плашите од температурата, таа е многу корисна, не треба да се симнува туку така. Треба да се бара причината.
Со мачкање алкохол не се симнува температура
Комовица, јаболков оцет, маст од јазовец… – ова се навистина лоши методи за намалување на температурата. Кога имаме температура, ние се потиме, излачуваме вода, таа испарува и ја носи топлината. Е сега вие нанесувате алкохол на кожата кој многу брзо испарува и ја разладува кожата. Кожата кога ќе се разлади ќе предизвика зголемено создавање на топлина бидејќи организмот тоа го сфатил како разладување. Според тоа, крвните садови се собираат поради студот, топлината се создава и температурата во внатрешноста расте, а не може да се манифестира на кожата, и тогаш децата добиваат фрас. Ако воопшто ја симнете температурата, тоа ќе биде за кратко.
Ако детето изгледа лошо, ако е омалаксано, има болки, тогаш е во ред, дајте му лек. Но, не во првиот момент кога ќе ви се причини дека температурата малку скокнала
Детето смее да седи дома три дена со температура
Колку дена детето смее да седи дома со температура? Ние велиме дека детето смее да биде дома три дена. Ако детето пет дена има сериозно покачена температура во однос на онаа својата редовна, тогаш веќе тука има нешто.
Она што најмногу му пречи на детето се моментите кога скока температурата. Тогаш се случува нешто во организмот. Ако цел ден има 39 степени, тоа дете нема да биде нешто којзнае колку болно“, објаснува проф. д-р Несторовиќ.
