Проф. д-р Гордан Лауч: Кој не сака да се вакцинира, не мора, тоа е прашање на лична одлука, како што е на пример, миењето раце после посета на тоалет ако сте да речеме готвач

За жал, истражувањата покажаа дека кај старите и болни луѓе, кои се изложени на најголем ризик од фатален крај поради грипот, вакцинацијата не е доволно ефикасна. Голема студија покажала дека помалку од 10% од луѓето постари од 65 години се ефикасно заштитени со вакцинација. Затоа е многу важно што повеќе млади и здрави лица да се вакцинираат секоја година за да ги заштитат најранливите со колективен имунитет

И покрај препораките на лекарите многумина се двоумат дали да се вакцинираат против грип, а ова се некои од најчестите прашања кои ги мачат неодлучните. На нив одговара хрватскиот научник Гордан Лауч.

Проф. д-р Гордан Лауч, научник и член на научниот совет на Владата на Хрватска, на својот Фејсбук профил напиша дека последните денови добива многу прашања за тоа дали треба младите и здрави луѓе да се вакцинираат против грип.

„Грипот е многу опасна болест која може да убие многу луѓе. Некои грипови низ историјата, како Шпанскиот грип, на пример, беа катаклизмични. За среќа, денеска имаме вакцини и можеме однапред да се заштитиме. За жал, истражувањата покажаа дека кај старите и болни луѓе, кои се изложени на најголем ризик од фатален крај поради грипот, вакцинацијата не е доволно ефикасна. Голема студија покажала дека помалку од 10% од луѓето постари од 65 години се ефикасно заштитени со вакцинација. Затоа е многу важно што повеќе млади и здрави лица да се вакцинираат секоја година за да ги заштитат најранливите со колективен имунитет“, напиша Лауч и одговори на неколку чести прашања поврзани со грипот и вакцинацијата.

• Може ли вакцината да предизвика некој да добие грип со уште потешки симптоми?

Проф. д-р Лауч: Вакцините содржат само некои фрагменти од вирусот, не можете да добиете грип од вакцината, ниту пак вакцината на кој било начин може да предизвика да имате „уште потежок грип“.

• Како вакцината влијае на имунитетот, дали го ослабува?

Проф. д-р Лауч: Вакцинацијата не го ослабува имунолошкиот систем, тие неколку антигени што ги добивате со вакцината се незначителни во однос на сите други антигени кои ќе ги изедете или вдишите. Глобалниот ефект на една вакцина врз нашиот имунолошки систем е занемарлив, а се развива специфична меморија која помага доколку дојдете во контакт со вистинскиот вирус.

• Дали здравиот начин на живот може да ја замени вакцината?

Проф. д-р Лауч: Вакцината не може да го замени „природниот“ и „здрав“ начин на живот. Нашите предци живееле природно и здраво, а 50 проценти од нивните деца умирале од заразни болести пред пубертетот. На пример, мојот дедо изгубил тројца браќа и сестра од Шпански грип за една недела.

• Дали вакцините се промовираат во толкава мера заради профитот на фармацевтската индустрија?

Проф. д-р Лауч: Вакцините не се заговор на фармацевтската индустрија, лекувањето на болни луѓе е многу попрофитабилно од вакцинацијата. Масовната вакцинација е резултат на програмите за јавно здравје, кои ги развиваат и поттикнуваат државите, а не фармацевтските компании.

• Дали ќе се вакцинирате против грип?

Проф. д-р Лауч: Јас лично ќе се вакцинирам, а ќе ги вакцинирам и децата, како и секоја година.

• Што е со оние кои не сакаат да се вакцинираат?

Проф. д-р Лауч: Кој не сака да се вакцинира, не мора, тоа е прашање на лична одлука, како што е, на пример, миењето раце после посета на тоалет ако сте да речеме готвач или благајник во супермаркет.