„Иако ова е добра вест во моментот, тоа за жал, значи дека со враќањето на зимата, би можел повторно да настапи потежок „зимски“ COVID-19, и се чини дека тоа го гледаме во моментов на јужната хемисфера каде што сега почнува зимата и има се повеќе тешко заболени“, вели професор Гордан Лауч
Смртноста од COVID-19 значително се намалила со пристигнувањето на потоплите денови, според студијата спроведена во осум европски и 15 кинески болници, која ја реализирал меѓународен тим на 51 научник од осум земји, меѓу кои и хрватскиот микробиолог проф. Гордан Лауч. Големата студија која го покажува сезонското влијание на вирусот SARS-CoV-2 опфатила 6.914 пациенти хоспитализирани поради COVID-19 и 37.187 лица кои самостојно пријавувале симптоми на COVID-19 во Велика Британија.
„Пратен е индивидуалниот тек на болеста кај 6.914 хоспитализирани пациенти. Во сите болници е воочено дека смртноста е значително намалена. Постојат неколку можни објаснувања за тоа, но истражувањето упатува дека најверојатно објаснување е промената на температурата, односно доаѓањето на пролетта“, вели Лауч и потенцира дека вирусот не се променил, туку се работи за последица на условите во кои вирусот влијае врз луѓето.
Тој исто така објаснува дека молекуларните механизми кои се во основата на сезонската природа на респираторните вируси вклучуваат два клучни елементи: гликани и влажност на воздухот.
Откако потврдивме дека намалувањето на тежината и смртноста на COVID-19 не е предизвикано од промена во возрасната структура на пациентите, се фокусиравме на промената на температурата и потврдивме дека почетокот на пролетта е најверојатното објаснување за забележаните промени
„Проблемот во сезоната на греење е тоа што релативната влажност во загреаните простори е многу мала, што ја деактивира нашата мукозна бариера и дозволува вирусите полесно да се шират. Во слузта која ја лачат нашите слузници се наоѓаат посебни гликопротеини муцини, чија главна задача е да ги „ловат“ вирусите и бактериите, кои потоа се отстрануваат од респираторниот систем со мукоцилијарен транспорт. Тоа е првата бариера против патогените, но за жал, не функционира ако ја дехидрираме со сув воздух. Се чини дека престанокот на греењето ја намали тежината на симптомите во цела Европа, но тоа, за жал, значи дека вирусот всушност не се променил и дека со почетокот на сезоната на греење би можеле повторно да имаме потешки форми на болеста“, објаснува проф. Лауч.
Имено, во грејната сезона без дополнително навлажнување на воздухот, релативната влажност во загреаните простории може да биде под 20%, што ја суши нашата мукозна бариера и спречува ефикасно отстранување на вирусот, а тоа и годи на прогресијата на болеста. Како што наведува и на својата ФБ страница, во поголемиот дел од светот во моментов има помалку смртни случаи и е намален бројот на тешки случаи, но сè уште не е јасно дали намалениот број на тешки случаи се должи на сезонската активност на вирусот или намалениот број на инфекции поради социјалното дистанцирање. Повеќето други коронавируси покажуваат силна сезонска природа, но за SARS-CoV-2 постојат многу потврдени случаи на инфекција и во тропските делови на светот, што исто така, докажува дека вирусот може ефикасно да се пренесува и во топли и влажни услови.
Меѓутоа, покрај влијанието на преносот на вирусот, топлото време може да влијае и на способноста на луѓето да се борат со вирусот и така да спречат развој на тежок облик на болеста. Оваа студија била спроведена откако со пристигнувањето на пролетта, во сите болници во Европа бил забележан силен и статистички значаен пад на смртноста, а исто така се намалила и сериозноста на болеста.
„Откако потврдивме дека намалувањето на тежината и смртноста на COVID-19 не е предизвикано од промена во возрасната структура на пациентите, се фокусиравме на промената на температурата и потврдивме дека почетокот на пролетта е најверојатното објаснување за забележаните промени. Зголемување на просечната температура за време на хоспитализацијата за еден степен целзиусов, ја намали смртноста за приближно 15%, што може да објасни значаен дел од намалената смртност од COVID-19 што во моментот ја гледаме во поголемиот дел од светот. Иако ова е добра вест во моментот, тоа за жал, значи дека со враќањето на зимата, би можел повторно да настапи потежок „зимски“ COVID-19, и се чини дека тоа го гледаме во моментов на јужната хемисфера каде што сега почнува зимата и има се повеќе тешко заболени“, изјави хрватскиот професор Гордан Лауч. (Вечерњи лист)
