Професорот Мауро Џака од „King’s College“ во Лондон, кој е експерт за кардиоваскуларни заболувања, одржа предавање пред Комитетот за наука и технологија на Британскиот дом на Лордови, каде што ги презентираше своите заклучоци за Ковид-19.
Тој претходно ги проучувал резултатите од обдукциите на луѓе кои починале од коронавирус, а заради оваа болест поминале еден месец или повеќе на интензивна нега или во болница.
Професорот дошол до заклучок дека кај овие пациенти коронавирусот оставил значителни оштетувања. Ковид-19 може да ги оштети белите дробови кај луѓето кои починале од коронавирусот до непрепознатливост, вели професорот Џака.
Тој исто така рекол дека коронавирусот кај луѓе кои поминале повеќе од еден месец во болница создава штета што резултира со „целосно нарушување на архитектурата на белите дробови“.
Сето ова го кажал пред Комитетот за наука и технологија на британскиот парламент, откако ги проучувал обдукциите на пациентите кои починале во Италија после 30 до 40 дена престој на интензивна нега.
Белите дробови кај луѓе кои имале коронавирус повеќе од еден месец пред да умрат е целосно спротивно од она што го наоѓаме кај луѓе кои имале пневмонија, грип или САРС
Професорот притоа открил и дека големи количини на вирус сè уште биле присутни во белите дробови на пациентите, но открил и голем број на поврзани клетки, што е невообичаено.
„Она што го наоѓаме во белите дробови кај луѓето кои имале коронавирус повеќе од еден месец пред да умрат е целосно спротивно од она што го наоѓаме кај луѓе кои, на пример, имале пневмонија, грип или САРС“, рече тој.
„Гледаме масивна тромбоза. Има целосно нарушување на архитектурата на белите дробови, а понекогаш и не може да се утврди дека тоа навистина биле бели дробови“, рече тој.
Додал и дека наоѓаат голем број поврзани клетки кои се позитивни за коронавирусот.
„Убеден сум дека патологијата на коронавирусот е толку уникатна заради тоа. Ова не е болест предизвикана од вирус кој убива клетки, што е многу важно за неговото лекување“, изјавил проф. Џака.
