Новите татковци ќе доживеат пад на нивото на тестостерон, а поголема продукција на пролактин и окситоцин, хормоните одговорни за грижливо однесување. Зголемувањето на овие хормони ќе влијае и на растот на тежината кај некои татковци, но она за што не се зборува доволно се промените во фокусот, помнењето и емоциите кои влијаат на многу татковци. Ново истражување потврдува дека не станува збор за индивидуално чувство, туку дека поимот „татковски мозок“ има смисла.
Промени во мозокот
Новото истражување објавено во списанието Cerebral Cortex покажало дека мозокот на мажите малку се намалува и менува откако ќе добијат дете, слично на она што се случува кај жените.
Мозокот карактеризира нешто што научниците го нарекуваат невропластичност, односно можност за адаптација на различни ситуации и учење нови вештини преку создавање врски во невралните патишта. Научниците сакале да истражат дали ќе дојде до промени во деловите од мозокот одговорни за грижливо однесување, емоционална регулација и емпатија, како и во деловите кои влијаат на примарните инстинкти како возбуда, мотивација, награда и претпазливост.
Зајакнување на емпатијата
Во истражувањето учествувале нови татковци и мажи чии партнерки биле бремени. Кај татковците дошло до видливи промени, односно намалување на еден дел од мозокот.
Намалувањето се случило во областите на мозокот кои се активни кога се одмораме или сме нефокусирани на некоја задача. Во такви моменти најчесто размислуваме или зборуваме за други луѓе. Ова ни олеснува да бидеме поефикасни во процесуирањето на социјалните информации.
Станува збор за адаптивно однесување кое им овозможува на мажите подобро да се грижат за децата, да имаат повисоко ниво на емпатија и да ги разберат потребите на детето.
Покрај горенаведените промени кои се случуваат кај мажите, новите мајки доживуваат дополнителни промени во мозокот кои се повеќе поврзани со нивните примарни инстинкти, емоции, страв и перцепција на заканите. Според експертите, тоа е поврзано со фактот дека мајката искусила бременост, додека татковците не.
